وەزیرانی تایبەتمەندی عێراق و سوریا تاوتوێی كەمبوونەوەی ئاو و گرفتەكانی دەكەن، وتەبێژی وەزارەتی سەرچاوە ئاوییەكانی عێراق دەڵێت، هەوڵە دیپلۆماسییەكان لەگەڵ توركیا و ئێرانیش دەستپێدەكەن.
بەهۆی كەمبارانی و گۆڕانكارییەكانی كەشوهەوا، هاوكات لەگەڵ پڕۆسەكانی گلدانەوەی ئاو لەلایەن وڵاتانی توركیا و ئێرانەوە، عێراق توشی كەمبوونەوەی ئاوی ڕووبارەكان و گرفت لەبوارە جیاجیا پەیوەندیدارەكاندا بووە.
عەلی ڕازی، وتەبێژی وەزارەتی سەرچاوە ئاوییەكانی عێراق ڕایگەیاند، مەهدی ڕەشید وەزیری سەرچاوە ئاوییەكان لە كۆبوونەوەیەكدا لەگەڵ هاوتا سورییەكەی، پرسی سەرچاوە ئاوییەكان و زیانەكانی كەمئاوی بەهۆی دۆخی ئاووهەواوە تاوتوێكردووە.
وتەبێژی وەزارەتی سەرچاوە ئاوییەكان وتیشی، “عێراق هەماهەنگی لەگەڵ سوریادا دەكات دەربارەی عەمباری ستراتیژی لە بەنداوەكان و دابەشكردنی ئاو بەشێوەیەكی دادپەروەرانە، بەپێی پەیماننامە و ڕێككەوتنە نێودەوڵەتییەكان”.
ڕازی ئەوەشی خستەڕوو، كەمیی باران و بەفر بووەتە هۆی كەمبوونێكی بەرچاوی سەرچاوەكانی ئاو، عێراقیش پشكی گەورەی لەو زیانە بەركەوتووە بەهۆی كەمبوونەوەی ئاوەوە.
دوپاتیشیكردەوە، دیدارەكان لەڕێی سەرجەم كەناڵە دیپلۆماسییە فەرمییەكان لەگەڵ هەردوو لایەنی ئێرانی و توركی بەردەوام دەبێت، بۆ زامنكردنی پشكی عێراق لە ئاوی ڕووبارە هاوبەشەكان و ڕوبەڕوبوونەوەی گرفتی ئاو، كە لەئێستادا عێراق بەدەستیەوە دەناڵێنێت.
پێشتریش تەمام ڕەعد، وەزیری سەرچاوە ئاوییەكانی سوریا ڕایگەیاندبوو، كەمبوونەوەی ئاوی فوڕات بۆ خوار 50%ی ئاستی پێشووی، كاریگەریی كردووەتە سەر ئاستی ئاو و وێستگەكانی ئاوی خواردنەوە و ئاوەڕۆ لە سوریا.
وتیشی، “هۆكاری كەمبوونەوەی ئاو لە سوریا، گلدانەوەی ئاوە لەلایەن توركیاوە، كە داوای لێدەكەین ئاو بەربداتەوە بەپێی پشكی دادپەروەرانەی بڕیاردراو بۆ هەریەك لە سوریا و عێراق”.
وەزیرەكەی سوریا داواشی لە كۆمەڵگەی نێودەوڵەتی و ڕێكخراوە نێودەوڵەتییەكان كرد دەستوەردان بكەن بۆ گەڕانەوەی ئاستی ئاوی فوڕات بۆ ئاستی پێشووی خۆی.
لە هەرێمیش هۆشداری دەدرێت
وشكەساڵی و كەمبونەوەی بارانبارین لەمساڵدا، بووەتە هۆی كەمبونەوەی ئاوی ژێر زەوی و بەنداوەكان، هۆشداری ئەوەش دەدرێت، ئەگەر دابەزینی ئاو بەردەوام بێت، كەمئاوی بۆ ماڵانیش دروست دەبێت.
پێشتر ئەكرەم ئەحمەد، بەڕێوەبەری گشتیی بەنداوەكانی هەرێم، بە تۆڕی میدیایی ئێستای ڕاگەیاند، بەهۆی وشكەساڵی و كەمبارانی، ئەمساڵ ساڵێكی نەهاتە و كەمئاوییە بۆ ئاوی ژێر زەوی و بەنداوەكان و تەنانەت گوندەكان، كاریگەریی لەسەر دابەشكردنی ئاو بەسەر ماڵانیش دەبێت.
وتیشی، “ئاوی ڕوبارەكانیش بەشێوەیەكی بەرچاو دابەزیوە و لە شوێنە دور و دەستەكانیش بەهۆی كەمبوونەوەی ئاو پێویستی بەلێدانی بیر و پێگەیاندنی ئاوە بەتەنكەرە، وشكەساڵیش كاریگەرییەكی زۆری دەركەوتووە”.
بەرپرسی بەنداوەكانی هەرێم، پێشی وایە، كەمبوونەوەی دابەشكردنی ئاو بەسەر ماڵاندا لەشارەكان كاریگەری كەمتری دەبێت وەكو لە گوند و قەزاكان، بەڵام بەشێوەیەكی گشتی كاریگەرییەكانی كەمئاوی دەركەوتووە.
