د. یوسف گۆران ڕایدەگەیەنێت، خەڵک بە هەڵە لە لامەرکەزییەت تێگەیشتوون ئەمە دوو ئیدارەیی نییە، لامەرکەزییەت زۆر یاسایی و ئیدارییە، لە زۆرێک لە وڵاتانی جیهان پەیڕەودەکرێت و پەیوەندیدار نییە بە دابەشبوون، قەوارەی هەرێمی کوردستان پارێزراو دەبێت و هیچ دابەشبوونێک ڕوونادات.
د. یوسف گۆران، ئەندامی مەکتەبی سیاسیی یەکێتیی نیشتمانیی کوردستان لە دیمانەیەکی تەلەڤیزیۆنیدا ئاشکرایکرد، ئێستا باشترین چارەسەر ئەوەیە یەکێتی و پارتی لەسەر بنەمای ڕاستییە نوێیەکان دابنیشنەوە و لەسەر ئەو بنەمایە حکومەت پێکبهێنن، ئەگەریش نەیانتوانی، ڕێگەچارەی یاسایی هەیە، کە دەتوانین پێی بڵێین (خۆبەڕێوەبردنێکی فراوان یان لامەرکەزییەت).
باسی لەوەشکرد، لامەرکەزییەت زۆر یاسایی و ئیدارییە، لە زۆرێک لە وڵاتانی جیهان پەیڕەودەکرێت و پەیوەندیدار نییە بە دابەشبوون، قەوارەی هەرێمی کوردستان پارێزراو دەبێت و هیچ دابەشبوونێک ڕوونادات، ئەو پرسە سەرەکییانەی کە تایبەتن بە هەرێمی کوردستان، وەک پەیوەندییەکانی دەرەوە و کاروباری پێشمەرگە، دەمێننەوە و هاوبەش دەبن، بەڵام لامەرکەزییەت دەبێت بۆ بەڕێوەبردنی ڕۆژانەی خۆمان لە پرسەکانی ڕێگەوبان، تەندروستی، پەروەردە و چەندین پرسی دیکە، ڕەنگە ئەوکاتە یەکێتی و پارتی کەمترین بەرکەوتنیان هەبێت، ئەمەش بە شێوازێکی یاسایی ڕێکدەخرێت.
ئەوەشی خستەڕوو، خەڵک پێیان وایە ئەمە دوو ئیدارەییە، بەڵام ئەمە هەڵە تێگەیشتنە و دوو ئیدارەیی نییە، دوو ئیدارەیی ئەوەیە دوو حکومەت، دوو هەرێم و دوو دەسەڵات هەبێت، ئەمە (چارەسەرێکی مەترسیدار)ە، بەڵام لە کۆتایدا ئەمە چارەسەرێکە و دڵخوازی ئێمە نییە، بەڵکو دەبێت بیر لە کوردستانی گەورە بکەینەوە، یەکێتیی نیشتمانیی کوردستانیش هەمیشە لەگەڵ ئەم کوردستانیبوونەدا بووە.
