توێژینەوەیەكی نوێ كاریگەرییە نەرێنییە تەندروستییەكانی مایكرۆپلاستیك ئاشكرادەكات كە ساڵانە زیاتر لە 460 ملیۆن تۆنی لە سەرتاسەری جیهاندا لێبەرهەم دێت.
توێژەران گەیشتنە پەیوەندییە بەهێزەكانی نێوان ئەم پلاستیكە وردانە و كۆمەڵێك نەخۆشیی مەترسیدار وەك گرفتی منداڵنەبوون و شێرپەنجەی كۆڵۆن و لاوازی ئەركی سیییەكان.
لە توێژینەوەكەدا، تیمی توێژینەوەی زانكۆی كالیفۆرنیا لە سان فرانسیسكۆ، پێداچوونەوەیان بە سێ هەزار توێژینەوەی زانستی دەربارەی كاریگەریی مایكرۆپلاستیك لەسەر تەندروستی كرد.
ئەنجامەكان دەریخست، ئەم ماددە بچوكە، كە بە چاوی ئاسایی نابینرێت، دزەیكردووەتە ناو (هەوا، خاك، خۆراك و ئاو)، تەنانەت ناو جەستەشمان، لەگەڵ ئەوەشدا دەشێت بەردەوام مایكرۆپلاستیك بچێتە ناو جەستەمانەوە بەبێ ئەوەی هەستی پێبكەین لەڕێی هەناسەدان یان خواردن یاخود خواردنەوەوە.
مایكرۆپلاستیك چەندین كاریگەریی نەرێنیی لەسەر تەندروستی هەیە، لە كۆئەندامی هەرسدا، توێژەران پەیوەندیی نێوان ئەم ماددەیە و زیادبوونی شێرپەنجەی كۆلۆن دەرخستووە. هەروەها كاریگەری لەسەر كۆئەندامی زاوزێ دەركەوتووە، بەهۆی كاریگەری لەسەر هاوسەنگیی هۆرمۆنی و كەمكردنەوەی كوالێتیی سپێرم و كاریگەری لەسەر هێلكەدان. هەروەك بوونی لە منداڵداندا گرێدراوە بە دابەزینی كێش لەكاتی لەدایكبوون و زیادبوونی مەترسیی لەدایكبوونی پێشوەختە.
سەبارەت بە سییەكانیش، مایكرۆپلاستیك دەبێتەهۆی هەوكردن لە رێڕەوی هەناسەدان كە هۆكارە بۆ زیادبوونی نەخۆشییە درێژخایەنەكانی هەناسەدان، وەك هەوكردن و شێرپەنجەی سییەكان.
توێژەران دەڵێن، مایكرۆپلاستیك تەنها لە ناوچە شارستانی و پیشەسازییەكاندا نییە، بەڵكو لە سروشتە دوورەدەستەكانی وەك كیشوەری جەمسەری باشوور و زەریا قوڵەكانیشدا دۆزراوەتەوە، بەهۆی قەبارە بچوكەكەیەوە بە ئاسانی دەچێتە ناو جەستەوە و دەشێت لە بەشە جیاجیاكاندا وەك جگەر و منداڵدان و شیری دایكدا كەڵەكە بێت.
هۆشداریشدەدەن بەوەی بەرهەمهێنانی پلاستیك تا ساڵی 2060 دەبێتە دوو هێندە و دەگاتە 1.1 ملیار تۆن، ئەمەش مەترسییەكان لەبارەی كاریگەرییە تەندروستییە مەترسیدارەكەی زیاتر دەكات.
