دیاریكردنی كات بۆ هێرشی ڕوسیا بۆسەر ئۆکرانیا بەردەوامە، بەشێک لە میدیا جیهانییەکان سبەی چوارشەممەیان وەك کاتی هێرشەكە دیاریكردووە، بەڵام ئەمریکا و بەریتانیا و خودی ڕوسیاش پێیان وایە هێشتا کات ماوە بۆ گفتوگۆ.
لە گفتوگۆی نێوان جۆ بایدن، سەرۆکی ئەمریکا و بۆریس جۆنسن، سەرۆک وەزیرانی بەریتانیادا ئەوە ڕاگەیەندرا، کە دەکرێت گفتوگۆ یەکێک بێت لە چارەسەرەکانی قەیرانی ئۆکرانیا.
ڕوسیا نزیکەی 100 هەزار سەرباز و پێداویستیی سەربازیی لە سنووری ئۆکرانیا کۆکردوەتەوە، لەگەڵ ئەوەشدا دەڵێت، “هیچ پلانێكمان بۆ هێرشکردنە سەر ئۆکرانیا نییە”.
کۆکردنەوەی هێز لەسەر سنوور بۆ ئۆکرانییەکان دیمەنێکە یادگاریی وێرانکەریان بەبیردەهێنێتەوە، بەڵام تا ئێستا سەرۆکی وڵات و دانیشتووانی وڵاتەكە دەڵێن، ئەگەر ڕوسیا هێرشبکات بەرگری دەکەن.
ڕوسیا بە کۆکردنەوەی هێز لەسەر سنوور دەیەوێت توڕەیی خۆی نیشانبدات لە نزیکبوونەوەی ئۆکرانیا و ئەوروپا و ناتۆ، ئۆکرانیاش بەهەمان شێوەی ڕابردوو تا ئێستاش ڕووی لە ئەوروپایە.
نزیکبوونەوەی ئۆکرانیا لە ئەوروپا و ناتۆ، ئەو ئەگەرەیە، کە ڕوسیا تا جوڵەی سەربازی و داگیرکردنی ئەو وڵاتە پێی ڕازی نابێت، ئەوروپا و ئەمریکاش وەک بەشێکی دیکەی کێشەکە پێیان وایە ئێستاش دەکرێت ڕێککەوتن لەنێوان ئەو دوو ئەگەرەدا بکرێت، نزیکبوونەوەی ئۆکرانیا لە ناتۆ، یان داگیرکردنی وڵات لەلایەن ڕوسیاوە.
