تیمەكانی فریاگوزاری لە ئیزمیر بەردەوامن لە گەڕان بەداوی قوربانییانی بومەلەرزەكە، بەگوێرەی ئامارە فەرمییەكانیش ژمارەی ئەو كەسانەشی مردوون بۆ 44 كەس بەرزبووەوە.
سەرۆکایەتیی بەڕێوەبردنی کارەسات و باری بەپەلەی تورکیا (ئافاد) ڕایگەیاندووە، ژمارەی ئەوانەی لە بومەلەرزەکەی ئیزمیر گیانیان لەدەستداوە گەیشتووەتە 44 کەس لەگەڵ بوونی 885 بریندار.
بەپێی ئەو ڕاگەیەندراوەی لە سەرۆکایەتیی بەڕێوەبردنی کارەسات و باری بەپەلەی تورکیا بڵاوکراوەتەوە، لە دوای بومەلەرزەکەی ئیزمیرەوە، 658 پاشلەرزە ڕویانداوە کە 40 دانەیان لە سەرووی چوار پلەی ڕێختەر بوون.
تا ئێستا کارەکانی گەڕان و ڕزگارکردن لە نۆ بینای شاری ئیزمیر بەردەوامییان هەیە و تا درەنگانێكی دوێنێ شەممە 31ی تشرینی یەكەم چەند كەسێك ڕزگاركران كە زیاتر لە 24 كاتژمێر لەژێر بینا ڕووخاوەكان بوون.
