جێگری سەرۆکی ئەنجومەنی وەزیران ڕایگەیاند، حکومەت پێداویستییەکانی دەستپێکردنی پڕۆسەی خوێندن دابیندەکات بۆ ئەوەی لە 14/ 9/ 2021دا خوێندن لە قوتابخانەکان دەستپێبکات و ئەو بەروارەش بۆ دەستپێکردنەوەی پرۆسەکە کرایە بڕیار.
قوباد تاڵەبانی جیگری سەرۆکی ئەنجومەنی وەزیران، ئەمڕۆ دووشەممە سەرۆکایەتیی کۆبوونەوەیەکی بۆردی پەروەردە و خوێندنی باڵای کرد کە تایبەت بوو بە دەستپێکردنەوەی پرۆسەی خوێندنی ساڵی 2021_ 2022 لەگەڵ چە‌ند بابە‌تێكی تری تایبەت بە ڕەوشی خوێندن و قوتابیان.
بەگوێرەی ڕاگەیەندراوێكی نووسینگەكەشی، سەرەتای کۆبوونەوەكە باس لە ئامادەکارییەکان و دابینکردنی پێداویستییەکانی خوێندن و خوێندكاران لەناو پۆلە‌كاندا كراوە، لەگەڵ پابەندبوون بە ڕێنماییەکانی تەندروستی و خۆپارێزی لە ڤایرۆسی کۆرۆنا.
جێگری سەرۆکی ئەنجومەنی وەزیران جەختیکردوە، حکومەت پێداویستییەکانی دەستپێکردنی پرۆسەی خوێندن دابیندەکات بۆ ئەوەی لە 14/ 9/ 2021 خوێندن لە قوتابخانەکان دەستپێبکات و ئەو بەروارەش بۆ دەستپێکردنەوەی پرۆسەکە کرایە بڕیار.
لای خۆیەوە وەزیری پەروەردە ئاماژەی بەوەدا کە ئەوان وەک وەزارەت و مامۆستایان و فەرمانبەران ئامادەن بۆ دەستپێکردنەوەی پرۆسەی خوێندن، هەروەها ڕایگەیاند، ئەمڕۆ ئەنجامی تاقیکردنەوە گشتییە‌كانی خولی یە‌كە‌می پۆلی دوازدە ڕادەگەیەندرێت.
لای خۆیەوە وەزیری خوێندنی باڵا و توێژینەوەی زانستی ڕایگەیاند، خوێندنی باڵا لەماوەی نێوان 1/9 تاوەکو 25/9 خوێندن دەستپێدەکات لەناو هۆڵەكانی زانكۆ.
وتیشی، “بەپێی رۆژژمێری زانکۆیی، زانکۆکان ئامادەکارییەكانیان دەستپێکردوون و بە ڕەچاوکردنی رێنماییە تەندروستییەکان دەوام دەستپێدەکات”.
ھە‌رلە کۆبوونەوەكەدا چۆنییەتی ڕێکخستنەوەی پرسی وەرگرتنی خوێندكاران لە زانکۆ و پەیمانگاکان بەشێوازێک کە لەگەڵ سەردەم و پێویستیی بازاڕ بگونجێت تاوتوێكرا، بەشداران جە‌ختیان لە گرنگیی خوێندنی پیشە‌یی كردەوە و هاوڕابوون كە پێویستە زیاتر پە‌رە‌ی پێبدرێت.
