پۆلیسی سلێمانی دەستگیرکردنی چوار تۆمەتباری ڕاگەیاند، کە هەژماری فەیسبوکی کەسێکیان هاک کردبوو و بەهەڕەشەی بڵاوکردنەوە شتە تایبەتەکانی بڕی چوار هەزار دۆلاریان لێسەندووە.
لە ڕاگەیەندراوێکدا بەڕێوەبەرایەتیی پۆلیسی سلێمانی ئاشکرایکرد، لەسەر سکاڵای هاوڵاتییەک لە بەشی پۆلیسی سەید سادق دوو تۆمەتباریان دەستگیرکردووە کە فەیسبوکی سکاڵاکەرەیان هاککردووە و هەڕەشەی بڵاوکردنەوەی شتە تایبەتەکانیان لێکردووە.
بەپێی ڕاگەیەندراوەکە، ئەو دوو تۆمەتبارە چوار هەزار دۆلاریان بە هەڕەشە لە خاوەنی هەژمارەکەی هاککراوەکە وەرگرتووە و داوای پارەی زیاتریان کردووە.
دوای دەستگیرکردنی یەکێک لە تۆمەتبارەکان دانیناوە بەتاوانەکەدا و ناوی تۆمەتبارێکی دیکەشی بردووە کە لە تاوانەکەیدا هاوکاریی کردووە و کەسی دووەمیش دەستگیرکراوە.
تۆمەتبارەکان ناویان ( ه ، أ ) ، (ه ، ح )ە و بەپێی ماددەی 431 لەیاسای سزادانی عیراقی ڕاگیراون .
هەروەها مەفرەزەكانی بنكەی پۆلیسی حەساری سەربە بەشی پۆلیسی سەید سادق دوو تۆمەتباری ژنیان دەستگیرکرد كە چووبوونە ناو ماڵێكەوە بەمەبەستی دزیکردن .
لەئێستادا هەردوو تۆمەتبار بەپێی ماددەی 444 لەیاسای سزادانی عیراق ڕاگیراون .
