ئیدارەی یانەی بەرشلۆنەی ئیسپانی هەوڵەکانی بۆ گواستنەوەی یاریزانێک لە پێگەی سەنتەری بەرگری دەستپێکردووە و سێ بەرگریکاری چەپلەریان دیاریکردووە.
ڕۆژنامەی موندۆ دیپۆرتیڤۆی کەتەلۆنی بڵاویکردووەتەوە، ئیدارەی بارسا لە نوسینگەکانی سیوتات ئیسپۆرتیڤا خوان گامبەر پێشنیازی فرۆشتنی ساموێل ئومتیتی بەرگریکاری فەرەنسیان کردووە، لە بەرانبەردا لیستێکیان لە سێ یاریزان پێکهێناوە و نوێنەرانیان لە ئیتاڵیا و هۆڵەندا ئاگادارکردووەتەوە کار لەسەر گواستنەوەی ئەو سێ بەرگریکارەدا بکەن کە لەلیستەکەدا ناویان هاتووە.
یەکێک لەو یاریزانانەی خواستیان لەسەریەتی ئالیسیۆ ڕۆمانیۆلی کاپیتانۆ و دڵی بەرگری میلانە، تەمەنی 26 ساڵە و پەیوەندی لەگەڵ ئیدارەی ڕۆسۆنێری باش نییە و گواستنەوەی بۆ هەرێمی کەتەلۆنیا مەحاڵ نییە.
دوو یاریزانە داواکراوەکەی دیکەش بە ڕەگەز ئەرجەنتینین تەمانیان 23 ساڵە و لە خولی هۆڵەندا یاریدەکەن، مارکۆس سێنسی سەنتەری بەرگری یانەی فاینۆرد دووەم داواکراوە و لیساندرۆ مارتینێزی بەرگریکاری 23 ساڵی یانەی ئەیاکس ئەمستەردام داواکراوێکی دیکەیە.
بەپێی سەرچاوەکە، نوێنەرانی بارسا بەهەمان شێوە پێشنیازی ناوی عیسا مێندی بەرگریکاری یانەی ڕیاڵ بیتیسیان کردووە، کە لە هاوینی 2021 بۆندەکەی کۆتاییدێت و گواستنەوەی بێبەرانبەرە.
