تەقینەوەیەك لە بەغداد ڕویدا و قوربانی هەیە
تەقینەوەیەك لە ڕۆژهەڵاتی بەغدادی پایتەخت ڕویدا و ژمارەیەك هاوڵاتی كوژران و برینداربوون.
شانەی ڕاگەیاندنی ئەمنی ئەمڕۆ پێنجشەممە 15ی نیسان ڕایگەیاند، بەهۆی تەقینەوەیەكەوە لە ناوچەی حەبیبییە-ی بەغدادی پایتەخت هاوڵاتییەك گیانی لەدەستدا و 12ی دیكەش برینداربوون.
بەپێی بەیاننامەیەكی شانەكە، تەقینەوەكە لە یەكێك لە بازاڕەكانی ناوچەكەدا ڕویداوە و جگە لە زیانە گیانییەكان بووەتە هۆی سوتانی پێنج ئۆتۆمبێلیش.
پێشتر میدیا عێراقییەكان لەسەر زاری سەرچاوە ئەمنییەكانەوە بڵاویانكردەوە، تەنێكی نامۆ لەكاتی سوتاندنی خاشاك و پاشماوەی ناوچەكە تەقیوەتەوە.
