تۆڕی هەواڵی سی ئێن ئێن ئاشكرایكرد، جۆ بایدن سەرۆكی ئەمریكا، بەنیازە فەرمانێك ئیمزابكات بۆ وەرگرتنی دەیان هەزار پەنابەری تر لە وڵاتەكەیدا.
زانیارییەكە كاربەدەستێكی ئیدارەی ئەمریكا بۆ سی ئێن ئێن-ی ئاشكراكردووە و ڕایگەیاندووە، “سەرۆك بایدن بەنیازە بڕیارێك بۆ وەرگرتنی پەنابەر ئیمزابكات و ئەوەش ڕەنگە ئامانجی دەیان هەزار كەس بەدیبهێنێت كە دەیانەوێت كۆچ بۆ ئەمریكا بكەن.”
بە وتەی سەرچاوەكە، لە سەردەمی سەرۆكایەتیی دۆناڵد ترەمپ دا پرۆگرامی وەرگرتنی پەنابەر لە ئەمریكا ئاستەنگی بۆدروستكرابوو، بەڵام بایدن دەیەوێت جارێكی تر دەرگا بۆ وەرگرتنی پەنابەران بكاتەوە.
سەرچاوەكەی كۆشكی سپی ئاشكرایكردووە، “پێدەچێت تا ڕۆژی هەینی، بایدن بڕیارەكە ئیمزابكات و لەدوای دەرچوواندنی بڕیارەكە بە 30 تا 120 ڕۆژ، دەرگای وەرگرتنی پەنابەران دەكرێتەوە.”
لە كاتی بانگەشەی هەڵبژاردندا، جۆ بایدن بەڵێنی دابوو ژمارەی پەنابەرانی وەرگیراو بۆ دە هێندەی پێشتر زیادبكات، بەوەش 125 هەزار پەنابەر لە ئەمریكا وەردەگیرێن.
