وەزارەتی تەندروستیی عێراق، لەگەڵ دووپاتکردنەوەی ئەوەی هیچ حاڵەتێکی ئاوڵەی مەیمون تۆمارنەکراوە لەناوخۆی عێراقدا، ئاماژەی بەوەکرد لە فڕۆکەخانەکان و دەروازە سنوورییەکان ریوشوێن دەگرنەبەر.
ریاز عەبدولئەمیر، بەڕێوەبەری بەشی تەندروستی گشتیی لە وەزارەتی تەندروستیی عێراق رایگەیاند، رێوشوێنی خۆپارێزیمان بۆ سەرجەم پارێزگاکان و بەڕێوەبەرایەتییە تەندروستییەکان و کارمەندانی تەندروستی بڵاوکردووەتەوە، ئامادەکاری پێویست کراوە بۆ مامەڵەکردن لەگەڵ هەر حاڵەتێکی گومانلێکراو.
ئاماژەی بەوەشکرد، تیم لە دەروازە سنوورییەکان و فڕۆکەخانەکان جێگیرکراون بۆ جیاکردنەوەی هەر حاڵەتێک کە نیشانەکانی نەخۆشییەکەی هەبێت، لە ئەگەری دەستنیشانکردنی هەر حاڵەتێکی گومانلێکراو، کارمەندانی تەندروستی جیایدەکەنەوە، پشکنینەکانی بۆدەکەن.
وەزارەتی تەندروستی بەدواداچوون لەگەڵ ڕێکخراوی تەندروستی جیهانی و سەرجەم لایەنە پەیوەندیدارەکانی ناوخۆ و دەرەوەی عێراق دەکات لەسەر هەموو پێشهاتەکان، هەروەها دامەزراوەکانی وەزارەتی تەندروستی توانای دەستنیشانکردن و مامەڵەکردنیان لەگەڵ ئەو جۆرە حاڵەتانەدا هەیە”.
لەلایەکی دیکەشەوە، سەیف بەدر وتەبێژی وەزارەتی تەندروستیی عێراق رایگەیاند، “وەزارەتی تەندروستیی عێراق شوێنكەوتەی رێكخراوی تەندروستیی جیهانی دەبێت لەبارەی پێشهات و سەرجەم كاروبارەكانی پەیوەست بە نەخۆشییەكە”.
ئەمەش لە کاتێکدایە، دوو رۆژ لەمەوبەر رێكخراوە جیهانییەكە رایگەیاند، بڵاوبوونەوەی ئاوڵەی مەیمون لە ئەفریقا گەیشتووتە “باری لەناكاوی جیهانی”، كە بەرزترین ئاستە لەلایەن رێكخراوی تەندروستییەوە رابگەیەندرێت.
