چێوەی هەماهەنگی دەستپێشخەرییەكی نوێ دەخاتەڕوو

كۆبوونەوەی یەكەمی موقتەدا سەدر و سەرانی چێوەی هەماهەنگی

لایەنە شیعییەكانی نێو چێوەی هەماهەنگی دەستپێشخەرییەكی نوێ بۆ كۆتاییهێنان بەو ‏دۆخە سیاسییە داخراوەی ئێستا دەخەنەڕوو.‏

چێوەی هەماهەنگی لە ڕاگەیەندراوێكدا كە شەوی ڕابردوو بڵاویكردووەتەوە دەڵێت، دوای ‏ئەو ناكۆكییە سیاسییانەی بوونەهۆی پێشێلكردنی ماددە دەستوورییەكان، جەختدەكەینەوە ‏لەسەر بەردەوامنەبوون یان دووبارەنەبوونەوەیان لەپێناو خزمەتكردنی ڕۆڵەكانی گەل و ‏هەماهەنگی بۆ بووژاندنەوەی دامەزراوەكانی دەوڵەت و وەلانانی بەربەستەكان لەبەردەم ‏ڕێگای بنیادنانەوە و ئاوەدانكردنەوە.‏

دەستپێشخەرییەكە چەند خاڵێك لەخۆدەگرێت، لەوانە: ‏

یەكەم: بانگێشتكردنی سەرجەم هێزە سیاسی و كەسایەتییە نیشتمانپەروەرەكان بۆ دەستپێكردنی ‏قۆناغێكی نوێ لە پەیوەندی و گفتوگۆ بۆ هێنانەدی دەستكەوتە دەستوورییەكان و ‏تەواوكردنی پێگەی سەروەری، بەجۆرێك هاوبەشیی ڕاستەقینە لە بەڕێوەبردنی وڵاتدا ‏بهێنێتەدی.‏
‏ ‏
دووەم: پاش شیكردنەوەكەی ئەمدواییەی دادگای باڵای فیدراڵی تایبەت بە وادەكانی ‏گەورەترین فراكسیۆن لەڕووی ژمارەی ئەندامان، كە كاتی زیاتری بەخشیوە و دەكرێت ‏بەكاربهێندرێت بۆ لێكتێگەیشتن و گفتوگۆ و زاڵكردنی بەرژەوەندیی گشتیی وڵات. ‏

سێیەم: ڕێككەوتنی گەورەترین فراكسیۆن لەسەر پێوەرەكانی هەڵبژاردنی سەرۆك ‏وەزیرانێكی بەهێز و بەتوانا و لێهاتوو، كە بتوانێت قۆناغەكە تێبپەڕێنێت، لەگەڵ ‏تایبەتمەندییەكانی پێكهێنانی كابینەی حكومەت بە پێوەرەكانی دەستپاكی و لێهاتوویی.‏

دەستپێشخەرییەكە لەكاتێكدایە وادەی دەستووری بۆ هەڵبژاردنی سەرۆك كۆماری نوێی ‏عێراق پێشێلكرا، هەروەها لایەنە سیاسییەكان، بەتایبەت شیعییەكان، لەسەر پێكهاتە و ‏جۆری حكومەتی داهاتوو بیروبۆچوونەكانیان لەیەك دوورن و هیچ هەنگاوێكیان بەرەو ‏ڕووی یەكتری نەناوە.‏

ڕەوتی سەدر پشتبەست بەو ڕێككەوتنەی لەگەڵ سوننەكان و پارتی كردوویەتی، سوورە ‏لەسەر پێكهێنانی حكومەتی زۆرینە و دوورخستنەوەی هێزەكانی دیكە، بەدیاریكراوییش ‏نوری مالكی، بەڵام هێز و پێگەی لایەنەكانی دەرەوەی ڕێككەوتنەكە ڕێگرن لە هاتنەدی ‏ئەو هەنگاوە.‏

بابەتی پێشتر

بۆردومانێكی توركیا بۆسەر خانوویەك لە حەسەكە قوربانیی مەدەنی لێكەوتەوە

بابەتی دواتر

ئەو خواردنانەی یارمەتی کەمخوێنی دەدەن

بابەتی پەیوەندیدار
Total
0
Share