بەپێی توێژینەوەیەكی نوێ ئەو كەسانەی زۆرینەی كاتەكانی كاركردنیان بە دانیشتن بەسەردەبەن، زیاتر رووبەڕووی مەترسیی مردنی پێشوەختە دەبنەوە بە رێژەی 16%، بەراورد بەو كەسانەی كاركردنیان پێویستی بە دانیشتنی درێژ نییە، وەك ئەوەی رۆژنامەی واشنتن پۆستی ئەمریكی بڵاویكردووەتەوە.
هەر بەپێی توێژینەوەكە ئەو كەسانەی كاركردنیان تێكەڵەیەك لە دانیشتن، راوەستان و جوڵە لەخۆدەگرێت، رووبەڕووی ئەو زیادبوونی مەترسییەی مردنی پێشوەختە نابنەوە.
توێژینەوەكە، كە ئەنجامەكانی لە گۆڤاری (جاما نیتوۆرك ئۆپن) لە تایوان بڵاوكراوەتەوە، زیاتر لە 481 هەزار كارمەند و كرێكاری تەمەن 20 ساڵ و زیاتر گرتووەتەوە، بە ناوەندی تەمەنی 39 ساڵ.
هیچ كام لە بەشداربووان كە بۆ ماوەی 13 ساڵ چاودێری كران، نەخۆشیی دڵیان نەبووە كاتێك توێژینەوەكە دەستیپێكردووە، هەروەك توێژینەوەكە ئاشكرایكرد كە رێژەی 34%ی مردنیان بەهۆی نەخۆشییەكانی دڵ و دەمارەكانەوە بووە.
لەگەڵ ئەوەشدا، بەشێك لەو كەسانەی زۆرترین كاتیان لە كاركردندا بە دانیشتن بەسەردەبەن، توانیویانە مەترسیی مردنی پێشوەخت بگەیەننە ئاستی ئەوانەی دانانیشن، لەڕێی زیادكردنی چالاكیی جەستەیی لە كاتی پشوویاندا بە بڕی تەنها 15 تا 30 خولەكی رۆژانە.
توێژەران دەڵێن، ئەنجامی توێژینەوەكەیان هاریكار دەبێت لە بەهێزكردنی ئەو بەڵگانەی لەبارەی پەیوەندیی نێوان ژیانی دوور لە جوڵە و مەترسییە تەندروستییەكاندا هەن.
توێژینەوەكە ئاماژە بە پێویستیی ئەنجامدانی گۆڕانكاریی سوودبەخش لە شوێنی كاركردندا دەكات، لەوانەش زیادكردنی ماوەی پشووی كارمەندان، تەرخانكردنی شوێنی كاركردن كە رێگە بە ئەنجامدانی چالاكیی جەستەیی بدات، چالاكیی بەكۆمەڵ و تایبەتمەندیدان بەو كارمەندانەی دەچنە هۆڵەكانی راهێنانی وەرزشییەوە.
