بۆ سێیه‌م ڕۆژ له‌سه‌ریه‌ك نرخی نه‌وت به‌هۆی گۆڕاوى ئۆمیكرۆنه‌وه دابه‌زی، ئه‌مڕۆ نرخی به‌رمیلێك نه‌وتى برێنت به‌ڕێژه‌ی 1.13% دابەزینی به‌خۆیه‌وه بینی.
به‌یانى ئه‌مڕۆ چوارشه‌ممه له‌گه‌ڵ كردنه‌وه‌ى بازاڕه‌كانى نه‌وتدا، جارێكى دیكە نرخى نه‌وت دابه‌زی و هه‌ر به‌رمیلێك نه‌وتى برێنت به‌ڕێژه‌ى 1.13% دابه‌زى و به 72.76 دۆلار مامه‌ڵه‌ى پێوه‌كرا.
هەروەها نرخی نه‌وتی خاوی خۆرئاواى ئه‌مریكاش 0.92 دۆلار دابەزی، كه ده‌كاته 1.3%ی نرخه‌كه‌ی، یه‌ك به‌رمیل بە 69.81 دۆلار مامه‌ڵه‌ى پێوه‌كرا.
ئاژانسی ڕۆیته‌رز بڵاویكرده‌وه، بڵاوبوونەوەی بەردەوامی گۆڕاوى ئۆمیکرۆن کاریگەریی لەسەر دابەزینی خواست لەسەر نەوت دروستكردووه، به‌وه‌ش سێیه‌م ڕۆژە له‌سه‌ر یه‌ك نرخى نه‌وت داده‌به‌زێت.
