کەمبوونەوەی سەرنج، یەکێکە لەو کێشانەی کە روبەڕووی مرۆڤ دەبێتەوە و زۆرجاریش دەبێتە هۆی بێزاری مرۆڤەکان بەتایبەت لەکاتی کارکردندا، هۆکارەکەشی بۆ چەند حاڵەتێک دەگەڕێتەوە، لەوانە: ماندووبوون، دڵەڕاوکێ، سەرقاڵی مێشک یان کەمی ڤیتامین.
ماڵپەڕی تەندروستی “هێلس شەت” بڵاویکردووەتەوە، چەندین رێگای جۆراوجۆر بۆ باشترکردنی سەرنجی مرۆڤ بوونی هەیە و سوودی بەرچاویان بۆ چارەسەرکردنی هەبووە، بەڵام لە ئێستادا پسپۆڕانی دەروونناسی کۆمەڵێك رێگای نوێیان دۆزیوەتەوە کە یارمەتیدەرت دەبێت بۆ باشترکردن و چالاککردنەوەی سەرنجەکانت بە شێوەیەکی گونجاو.
یەکەم: ئەنجامدانی خەوی کورت:
شیوازێکی گونجاوە بۆ چالاکردنەوەی خانەکانی مێشک و باشترکردنی سەرنجی مرۆڤ. هاوکات، دەتوانیت لە شوێنی کارکردن و لە گەشتکردنیشدا بەکاریبهێنیت. لەم شێوازەدا پێویستە شوێنێکی ئارام و بێدەنگ بۆ خەوتن هەڵبژێریت، هەروەها دەبێت ماوەی خەوتنەکەت کەم بێت بەجۆرێک 20 خولەک تێپەڕنەکات و کاتێکی زۆر نەخایەنێت، پاشان کاتێک هەستایت بە هێواشیی چاوەکانت بکەرەوە و بە ئارامی دەست بە جوڵە بکە، ئەم رێگایە یارمەتیدەرت دەبێت لە نوێکردنەوەی سەرنجت و پشوویەکی کورت بە مێشکت دەدات.
دووەم: سوودوەرگرتن لە کرداری ئارامبوونەوە “مێدیتەیشن”
کرداری ئارامبوونەوە “مێدیتەیشن” یەکێکە لەو رێگایانەی بۆ چالاککردنەوەی خانەکانی مێشک و سەرنجی مرۆڤ سوودبەخشە، ئەنجامدانیشی لە رێگای دانیشتن لە شوێنێکی ئارام و کۆنتڕۆڵکردنی هەناسە و داخستنی چاوەکانەوە دەبێت.
سێیەم: پشتبەستن بە نووسین:
نووسینی تێبینییەکان یاخود لیستی داواکاریی و ئەرکەکان، یارمەتیدەرێکی گونجاوە بۆ بەتاڵکردنەوەی مێشک و ئارامبوونەوەی سەرنجی مرۆڤ، چونکە بەشێکی کێشەی سەرنج بەهۆی جەنجاڵی و زۆری بابەتەکانەوەیە لە مێشکی مرۆڤدا، هەربۆیە کاتێک قەڵەم دەهێنیت و سەرنجەکانت دەکەیتە سەر کاغەز بارودۆخەکە باشتر دەبێت و سوودێکی زۆر وەردەگریت.
