بەهۆی خراپی ئەنجامە تۆمارکراوەکانەوە، ئەگەری دوورخستنەوەی ئولی گۆنار سۆڵشایەری نەرویجی ڕاهێنەری یانەی مانچستەر یونایتد هاتووەتە ئاراوە.
لە کۆتا ڕوبەڕوبوونەوەی خولی نایابی ئینگلیزی بەرانبەر ئارسیناڵ، مانچستەر یونایتد بە ئەنجامی گۆڵێکی بێوەڵام دۆڕاندنی تۆمارکرد. شەوی ڕابردووش لە خولی یانە پاڵەوانەکانی ئەوروپا بەرانبەر ئیستانبوڵ باشاکشەهیر (2-1) دۆڕاندنێکی دیکەیان تۆمارکرد.
لەم وەرزەدا و لە چوارچێوەی ململانێکانی پریمەرلیگ، پێکهاتەی سۆڵشایەر لە کۆی شەش ڕوبەڕوبوونەوە سێ دۆڕاندنی تۆمارکردووە و ئەنجامەکان بەگشتی بەپێی پێویست نەبوون.
ڕۆژنامەی دەیلی مەیڵی بەریتانی ئاشکرایکردووە، زۆرینەی کۆمپانیاکانی گرەوکاری گرەویان لەسەر دوورخستنەوەی سۆڵشایەر کردووە، لە بەرانبەردا ماریسیۆ پۆچتینۆی ئەرجەنتینی ڕاهێنەری پێشووی یانەی تۆتنهام وەک پاڵێوراوی سەرەکی بۆ پێگەکەی دیاریدەکەن.
بەپێی سەرچاوەکە، سۆڵشایەر لەژێر گووشارێکی خنکێنەردایە و ڕوبەڕوبوونەوەی شەممەی داهاتوو بەرانبەر یانەی ئێڤەرتۆن هاوشێوەی تاقیکردنەوەی کۆتاییە، لە حاڵەتی دۆڕاندندا بە ئەگەرێکی زۆرەوە نەرویجییەکە دووردەخرێتەوە، دوای ئەو وادەیەش دوو هەفتە حەوانەوە نێودەوڵەتییەکان لەبەردەم ئیدارەی شەیتانە سوورەکان دەبێت و ئەو ماوەیەش گونجاوە بۆ دەستبەکاربوونی ڕاهێنەرێکی نوێ.
سۆڵشایەر لە 22ی دیسێمبەری 2018 یەکەمین یاری مانچستەر یونایتدی وەک ڕاهێنەر بەرانبەر کاردیف سیتی ئەنجامدا، تاوەکو ئێستا 100 یاری بەڕێوەبردووە و نەیتوانیوە پێکهاتەیەکی گونجاو بۆ یانە زەبەلاحەکە بونیادبنێت.
