كچە خوێندكارێكی كۆلێژی پزیشكی لە كەربەلا، لەكاتی چركاندنی وێنەی سێڵفیدا مرد.
بەپێی زانیارییەكان، ئەو كچە خوێندكاری كۆلێژی پزیشكی بووە لە زانكۆی “ئەلعەمید”، لەكاتی چركاندنی وێنەی سێڵفیدا لە نهۆمی سێیەمی كۆلێژەكەیەوە كەوتووەتەخوارەوە.
بەپێی وتەی ڕاگرایەتیی كۆلێژەكە، كچەكە بە سەختی برینداربووە و دوای گەیاندنی بە نەخۆشخانە گیانی لەدەستداوە.
ڕۆژنامەی “سەن”ی بەریتانی ئامارێكی لەبارەی مردن بەهۆی سێڵفیگرتنەوە بڵاوكردووەتەوە و ئاشكرایكردووە، 330 كەس لە سەرانسەری جیهان لەكاتی چركاندنی وێنەی سێڵفیدا مردوون.
ڕوونیكردووەتەوە، ئەو كەسانە بەهۆی كەوتنەخوارەوە لە باڵەخانە یان شاخ، خنكان لە ئاو و كارەباگرتندا مردوون كاتێك هەوڵیانداوە سێڵفیی نمونەیی بچركێنن.
بەپێی ئامارەكان، لە هندستان 176 كەس و ئەمریكا 26 كەس و لە ڕوسیا 19 كەس بەهۆی سێڵفییەوە مردوون و ئەو سێ وڵاتە زۆرترین ژمارەی مردن بەو هۆكارەیان تۆماركردوون.
