بەڕێوەبەرایەتیی کەشناسی و بومەلەرزەزانیی سلێمانی ئاشکرایکرد، لەماوەی شەو و ڕۆژی ڕابردوودا هەشت بوومەلەرزە لە سنوورەکانی ڕۆژهەڵاتی کوردستان لەگەڵ هەرێم و ناوچەکانی گەرمیان ڕوویانداوە، زیاتربوونی بومەلەرزەكان دەگەڕێنێتەوە بۆ چالاكیی پلێتی نێوان باشوور و ڕۆژهەڵاتی كوردستان.
لەلێدوانێکدا بۆ تۆڕی میدیایی ئێستا، ئاسۆ کەمال بەڕێوەبەری کەشناسی و بومەلەرزەزانیی سلێمانی وتی، هەشت بومەلەرزە لە کاتژمێر 9:00ی بەیانیی دوێنێوە تا کاتژمێر 11:00ی شەوی ڕابردوو لە ناوچە سنوورییەکانی نێوان هەرێم و ڕۆژهەڵاتی کوردستان و ناوچەکانی کەلار و کفری ڕوویانداوە.
بەپێی تۆمارەكانی پێوانەکانی کەشناسیی سلێمانی، بومەلەرزەی یەکەم لە کاتژمێر 9:02 خولەک لە سنوورەکانی ڕۆژهەڵاتی کوردستان و 43 کیلۆمەتر لە ڕۆژهەڵاتی کفری بە گوڕی 3.8 پلەی ڕێختەر ڕوویدا، بومەلەرزەی دووەم لەکاتژمێر 11:58 خولەک بە گوڕی 4.3 پلە ڕوویدا، بومەلەرزەی سێیەم لە کاتژمێر 2:34 خولەک ڕوویداوە بەگوڕی 2.8 پلەی ڕێختەر، هەروەها کاتژمێر 2:38 خولەک بەگوڕی 2.9، کاتژمێر 2:43 خولەک بەگوڕی 3.1 پلە، کاتژمێر 2:46 خولەک بەگوڕی 4.4 پلە چەند بومەلەرزەیەکی دیکە ڕوویانداوە، ئەمەی دوایی تاڕادەیەکی زۆر هەستیپێکراوە.
هەروەها کاتژمێر 2:57 خولەک بە گوڕی 2.7 پلە و کۆتا بومەلەرزە لە کاتژمێر 10:10 خولەکی شەوی ڕابردوو بە گوڕی 3.6 پلە بە پێوەری ڕێختەر لەو ناوچانە ڕوویانداوە.
بەڵام بەڕێوەبەری کەشناسیی سلێمانی دڵنیایی دا لەوەی هیچ زیانێکی گیانی و ماددی لەو بومەلەرزانە نەکەوتووەتەوە.
بە لێكدانەوەی کەشناسیی سلێمانی، بەپێی هەڵکەوتەی ئەو ناوچانەی هەرێمی کوردستان کە هاوسنوورن لەگەڵ ڕۆژهەڵاتی کوردستان و لەسەر هەمان پلێتن، ساڵانە لەم وەرزەدا بومەلەرزە ڕوودەدات، چونکە چالاکیی بومەلەرزە لەو ناوچانەدا زۆرن و لەئێستادا لەهەموو کاتەکانی دیکەی ساڵ چالاکترە.
