بەپێی تۆمارەكان پلەی گەرمای مانگی تشرینی یەكەم بەراورد بە هەمان مانگی 30 ساڵی رابردوو تاڕادەیەك سەقامگیرە، بەڵام لەڕووی بارانبارینەوە بەڕێژەیەكی بەرچاو كەمیكردووە.
جەوهەر حەمەلاو، لێپرسراوی بەشی كەشوهەوا لە بەڕێوەبەرایەتی كەشناسی و بومەلەرزەزانیی سلێمانی رایگەیاند، بەپێی داتا تۆماركراوەكانی وێستگەی كەشناسیی سلێمانی بەرزترین پلەی گەرما لە مانگی تشرینی یەكەمی ئەمساڵ 32.6 پلەی سەدی و نزمترین پلەی گەرما 13.6 پلەی سەدی بووە.
دەشڵێت، “تێكڕای پلەی گەرمی 21.5 پلەی سەدی بووە، لەكاتێكدا تێكڕای پلەی گەرمی لە مانگی تشرینی یەكەمی 30 ساڵی رابردوو 22.6 پلە بووە”.
كۆی گشتی بڕی بارین لە مانگی رابردوودا 9.3 ملم بووە، لەكاتێكدا تێكڕای بڕی بارین لە 30 ساڵی رابردووی مانگی تشرینی یەكەمدا 34.4 ملم بووە، وەك ئەوەی بەرپرسەكەی كەشناسی روونیكردووەتەوە.
