لە هاوینی ساڵی 2014ـدا، کاتێک تێرۆریستانی داعش هێرشێکی بەرفراوانیان بۆ سەر ناوچە جیاوازەکانی عێراق و هەرێمی کوردستان دەستپێکرد، مەخمور بووە یەکێک لە ڕووبەرە ستراتیجییە گرنگەکان؛ کەوتنی ئەم شارۆچکەیە مەترسییەکی ڕاستەوخۆی لەسەر هەولێری پایتەخت و دەوروبەری دروستکرد.
لەم ساتی وەرچەرخانەدا، بەشداریی ڕاستەوخۆ و خێرای هێزەکانی دژەتیرۆر (CTG) و هێزەکانی پێشمەرگەی یەکێتیی نیشتمانیی کوردستان، هاوکێشەی شەڕەکەی بە تەواوی گۆڕی.
لەگەڵ دروستبوونی مەترسی لەسەر ناوچەکە، بە فەرمانی ڕاستەوخۆ و سەرپەرشتیی مەیدانیی سەرکردایەتیی یەکێتی، هێزەکانی دژەتیرۆر وەک هێزێکی تایبەت و مەشقپێکراو دەستبەجێ ڕەوانەی میحوەرەکەی مەخمور کران؛ گەیشتنی ئەم هێزانە بە چەکی پێشکەوتوو، ڕێکخستنی ئەمنیی بەرز و ورەیەکی بەهێزەوە، بووە خاڵی وەرچەرخان لە بێئومێدکردنی چەکدارانی داعش.
پسپۆڕانی سەربازی دەڵێن، ڕزگارکردنی مەخمور تەنیا شەڕێکی ئاسایی نەبوو، بەڵکو یەکەم تاقیکردنەوەی ڕاستەقینەی شکستپێهێنانی ئەفسانەی داعش بوو لە ناوچەکەدا. هێزەکانی دژەتیرۆر بە داڕشتنی پلانێکی تۆکمەی هێرشکردن و بەکارهێنانی تەکتیکی جەنگیی دەستبەدەست و هاوشانی تۆپخانە، توانییان هێڵەکانی بەرگریی تێرۆریستان لە دەوروبەری شارۆچکەکە تێکبشکێنن.
هاوکات لەناو شارۆچکەی مەخموردا، هێزەکانی دژەتیرۆر بە ئازایەتییەکی بێئەندازەوە چوونە ناو کۆڵان و گەڕەکەکان و پاکسازییان دەستپێکرد، کە بووە هۆی کوژرانی دەیان تێرۆریستی داعش و هەڵاتنی سەدانی دیکەیان. ئەم بەزاندنەی داعش لە مەخمور، وەک یەکەمین شکستی گەورە و مێژوویی ئەو ڕێکخراوە لەسەر دەستی هێزەکانی دژەتیرۆر تۆمارکرا، کە دواتر ڕێگەی خۆشکرد بۆ ڕزگارکردنی ناوچەکانی دیکە.
سەرکردایەتیی یەکێتیی نیشتمانیی کوردستان لە نزیکەوە چاودێریی بەڕێوەچوونی ئۆپراسیۆنەکەیان دەکرد و تەواوی پشتگیریی لۆجستی و سەربازییان بۆ هێزەکانی دژەتیرۆر دابینکرد، بەهۆی ئەم پشتیوانییە بەردەوامەوە، مەخمور نەبووە تەنیا خاڵی بەرگریکردن، بەڵکو بووە مەیدانی هێرشبردن و وەدەرنانی دوژمن. کۆنترۆڵکردنەوە و ڕزگارکردنی مەخمور لەسەر دەستی هێزەکانی دژەتیرۆری یەکێتی، مەترسیی ڕاستەوخۆی لەسەر هەولێر و پارێزگاکانی دەوروبەر دوورخستەوە.
ئەم داستانە لە مێژووی هاوچەرخدا وەک سەروەرییەکی سەرەکی بۆ هێزەکانی دژەتیرۆر ماوەتەوە، چونکە توانییان بۆ یەکەم جار لەسەر ئاستی عێراق و ناوچەکە، شکستهێنانی داعش بسەلمێنن و بە جیهان بڵێن، کە هێزی دژەتیرۆر قەڵغانی پاراستنی خاک و هاووڵاتییانە.
