ڕۆژی پێنجشەممە کارەکانی پانزەیەمین فێستیڤاڵی نێودەوڵەتیی بابل دەستپێكران، دوای ئەوەی بۆ ماوەی 19 ساڵ و لەدوای ساڵی 2003ـەوە ڕاگیرابوو.
شانۆی بابل لە شاری مێژوویی بابل لە دووریی 100 کیلۆمەتر لە باشووری بەغدادی پایتەختەوە، کارەکانی فێستیڤاڵەکە لەخۆدەگرێت و بۆ ماوەی پێنج ڕۆژ بەردەوامدەبێت.
فێستیڤاڵەکە لەژێر ناوی “لە شارستانییەتی بابلەوە ژیان دروستدەکەین” بەردەوامدەبێت، تێیدا نمایشی جۆراوجۆر دەکرێت لەوانە، گۆرانی، سەما، هونەری گەلان، پێشانگەی کتێب و وێنە.
چەندین گۆرانیبێژی عێراقی و عەرەب بەشداریی فێستیڤاڵەكە دەكەن، لەوانە حەمید مەنسوڕ، حاتەم عێراقی، ڕەحمە ڕیاز، شەزا حەسون، نەوال زوغبی، هانی شاكر و فیفیان موراد.
