زانایانی گەردوونناسیی بەریتانی ئاماژە بۆ بوونی نیشانەی ڕوون دەکەن لەبارەی بوونی ژیان لەدەرەوەی گۆی زەوی و تەنانەت دەرەوەی کۆمەڵەکەشمان، ئەم بۆچوونانەشیان پشتیان بە کۆمەڵێک پێوەری زانستی بەستووە.
ڕۆژنامەی گاردیانی بەریتانی بڵاویکردەوە، ئەو پێشبینییەی زانایان دوای دووبارە پێداچوونەوە بۆ سروشتی هەسارەکان کراوە کە دەکرێت ژیانیان تێدابێت.
زانایانی بەریتانی گرنگییان بەو هەسارانەداوە کە پێکهاتە و قەبارە و پلەی گەرمی کەشوهەوایان لە زەوییەوە نزیکە.
لەدوایین ڕاگەیاندنیاندا دەڵێن، ئەگەرێکی زۆری هەیە ژیان لە دەرەوەی کۆمەڵەی خۆر هەبێت، بەپێی ئەو پێوەرە زانستییانەی لە نوێترین بەدواداچوونەکاندا پێیگەیشتوون.
زانایان ئاماژەیان بە هەسارەی نپتۆنی بچوک کردووە کە یەکێکە لەو هەسارانەی نزیکیی هەیە لە زەوییەوە و دەکرێت ژیانی لەسەربێت، نیوە تیرەکەی دوو هێندەی تیرەی زەوی و قەبارەکەی هەشت هێندەی زەوی دەبێت و هەسارەی هاوشێوەش لەگەردووندا زۆرن.
نیکۆ مادوسۆدان، زانای گەردوونناس لە زانکۆی کامریج دەڵێت، ئەم هەسارانە دەچنە ناو کۆمەڵەیەکی نوێوە کە سەرجەمیان ئاویان تێدایە و بە زەریا و بەرگەهەوای هایدرۆجینی داپۆشراون، گرنگیدان بە لێکۆڵینەوە لەم هەسارانە دەتوانێت پرۆسەی گەڕان بەدوای ژیان لەدەرەوەی زەوی ئاسان بکات.
