دوای ئەوەی کارمەندێکی هاتوچۆی گەرمیان لێپێچینەوە لە سەرپێچیکارێک دەکات، دواتر ئەو کەسە کارمەندەکەی هاتوچۆ ڕوبەڕوی دادگا دەکاتەوە، جێگری سەرۆکی حکومەت دەڵێت “لە پێناو زامنکردنی ئاسایش و ئارامی بۆ هەمووان بەرگریکارێکی سەرسەختی ئەو کارمەندە دەبین”.
بەشی ڕاگەیاندنی ئیدارەی گەرمیان ئاشکرایکردووە، ” قوباد تاڵەبانی، جێگری سەرۆکی حکومەتی هەرێم پەیوەندی بە کارمەندەکەی هاتوچۆ دەکات و پشتیوانی خۆی بۆ دوپاتدەکاتەوە و جەخت دەکاتەوە لەوەی، داکۆکیکاری سەرسەخت دەبێت بۆ بەدەستهێنانی مافەکانی ئەو کارمەندە و هەر کارمەندێک لەکاتی ڕاپەڕاندنی ئەرکەکانی روبەروی کێشە ببێتەوە، ئەوەش لەپێناو زامنکردنی ئاسایش و ئارامی بۆ هەمووان.”
ئیدارەی گەرمیان ڕاشیگەیاندووە، ” لێرەوە بۆ ڕای گشتی ڕایدەگەیەنین، خودی سەرپەرشتیاری ئیدارەی گەرمیان لەئێستادا بە ووردی چاودێری کەیسەکە دەکات و بەدڵنیاییەوە ڕێگە نادرێت کەیسەکە بە لاڕێدا ببرێت، تەنها بڕیاری دادگا یەکلایی کەرەوە دەبێت بۆ ئەو کەیسە”.
لەچەند رۆژی رابردوودا، کارمەندێکی هاتوچۆی گەرمیان بەناوی (ئەحمەد عادل) لەکاتی ئەرکدا و لێپێچینەوە لە هاوڵاتیەک دەکات کە سەرپێچی هاتوچۆی ئەنجامدابوو، روبەڕوی هەڕشە دەبێتەوە و کەیسەکەی دەباتە بەردەم داداگا، دواتر تۆمەتبار سکاڵای یاسایی لەسەر کارمەندەکەی هاتوچۆ تۆمار دەکات بە تۆمەتی خراپ بەکارهێنانی دەسەڵات لەکاتی راپەڕاندنی ئەرکدا، بەو تۆمەتەش کارمەندەکەی هاتوچوو لەلایەن دادگاوە داوادەکرێت و دواتر بە کەفالەت ئازاد دەکرێت.
