لەسەر سنووری نێوان ئەمریكا و مەكسیك 545 منداڵی کۆچبەر كە لە خێزانەكانیان دابڕاون و ونبوون، تا ئێستا خێزانەكانیان نەدۆزراونەتەوە و بێكەس ماون.
بەهۆی ئەو سیاسەتەی ئیدارەی دۆناڵد ترەمپ لە بەهاری 2018وە دەستی بە پەیڕەوکردنی کرد تا ڕێگە لە هاتنی کۆچبەرانی ئەمریکای ناوەڕاست بگرێت، زیاتر لە 2 هەزار و 700 منداڵی کۆچبەر لە خێزانەکانیان دابڕاون.
دانا سابراو، دادوەری دادگای فیدڕاڵی ئەمریکا، تانەکانی یەکێتیی ڕێکخراوەکانی کۆمەڵگای مەدەنی ئەمریکای لەو بارەیەوە هەڵسەنگاند و بڕیاری دا ئەو منداڵانەی بەهۆی بڕیارەکەی دۆناڵد ترەمپ لە خێزانەکانیان دابڕاون دووبارە بە خێزانەکانیان شاد بکرێنەوە.
لەم چوارچێوەیەشدا بەرپرسانی ئەمریکا ئەوەیان ئاشکرا کرد کە هەزار و 30 منداڵ لای بەرپرسانی ئەمریکا زانیارییەکانیان تۆمار کراون، دوای هەوڵ و بەدواداچوون تواندراوە خێزانی 485 منداڵ بدۆزرێنەوە، بەڵام تا ئێستا نەتواندراوە خێزانی 545 منداڵ بدۆزرێتەوە.
