رۆژنامەی نیویۆرک تایمزی ئەمریکی بڵاویکردووەتەوە، حکومەتی سعودیە بەنیازە سندوقێکی وەبەرهێنان دروست بکات بە بڕی زیاتر لە 40 ملیار دۆلار بە مەبەستی وەبەرهێنان لە بواری زیرەکی دەستکرددا.
ئەو رۆژنامەیە لە راپۆرتێکدا کە بڵاویکردووەتەوە ئاماژەی بەوەشکردووە، نوێنەرانی سندوقی وەبەرهێنانی گشتی لە چەند هەفتەی رابردوودا باسیان لە ئەگەری هاوبەشیکردن لەگەڵ کۆمپانیای ئەندرێسن هۆرۆڤیتزی ئەمریکی و چەندی کۆمپانیایەکی دیکەی دارایی کردووە.
لە راپۆرتەکەدا هاتووە، یاسر رومەیان، پارێزگاری سندوقی وەبەرهێنانی گشتی لەگەڵ ئەندرێسن هۆرۆڤیتز باسی لە ئەگەری کردنەوەی ئۆفیسێکی کۆمپانیا ئەمریکییەکە لە ریاز کردووە.
پارێزگاری سندوقی وەبەرهێنانی گشتی لە لێدوانێکیدا لەوبارەیەوە دەڵێت، “وڵاتەکەمان خواستێکی زۆری هەیە بۆ جێبەجێ کردنی پڕۆژەکانی زیرەکی دەستکرد و بودجەیەکی تەرخانکراویشی هەیە کە دەمانەوێت لە پەرەپێدانی تەکنەلۆژیادا خەرجی بکەین”.
