وەزارەتی تەندروستی هەرێم ڕایدەگەیەنێت، 829 توشبووی نوێی كۆرۆنا تۆماركراوە و هەزار و 142 توشبووش چاكبوونەتەوە.
وەزارەتی تەندروستیی هەرێمی كوردستان ئەمڕۆ دووشەممە ئاماری نوێی كۆرۆنای بڵاوكردەوە و ڕایگەیاند، لەماوەی 24 كاتژمێری ڕابردوودا حەوت هەزار و 585 پشكنینی نوێ ئەنجامدراوە و لەو ژمارەیە 829 توشبوو تۆماركراوە.
هەر لەو ماوەیەدا هەزار و 142 توشبوو چاكبوونەتەوە و 10 توشبووش گیانیان لەدەستداوە كە زۆرترینیان لە سلێمانی بووە بە چوار حاڵەتی گیانلەدەستدان.
بەپێی ئامارەكەی تەندروستی كۆی گشتیی توشبووانی كۆرۆنا گەیشتووەتە 157 هەزار و 482 توشبوو، لەو ژمارەیە 138 هەزار و 21 توشبوو چاكبوونەتەوە و چوار هەزار و 118 توشبووش گیانیان لەدەستداوە.
