یەكێتیی ئەوروپا نیگەرانی لەبارەی دادگاییكردنی چالاكوانانی بادینان دەردەبڕێت و داواش لە حكومەتی هەرێمی كوردستان دەكات پابەندییەكانی لە بواری مافەكانی مرۆڤ لەبەرچاوبگرێت.
نێردەی یەكێتیی ئەوروپا و نێردە دیبلۆماسییەكانی وڵاتانی ئەندام لە یەكێتییەكە لە عێراق ئەمڕۆ دووشەممە ڕاگەیەنراوێكیان بڵاوكردەوە و تیایدا نیگەرانی لەبارەی ئەو بڕیارەوە دەردەبڕن كە بەدواییە لەلایەن دادگای پێداچوونەوەی هەولێر تایبەت بە پەسەندكردنی سزای بەندكردنی ڕۆژنامەنوس و چالاكوانانی بادینان دەرچووە.
لە بەیاننامەكەدا هاتووە، “ئازادی ڕادەربڕین و ئازادی ڕۆژنامەگەری، بەهەمان شێوە مافی دادگاییەكی دادپەروەرانە لە بنەچە سەرەكییەكانی كۆمەڵگا دیموكراتییەكانە، سەرەڕای بوونی دامەزراوەی شەفاف و ئامادە بۆ لێپرسینەوە”.
نێردەی ئەوروپا دەشڵێت، بڕیارەكەی دادگا كاریگەری نەرێنی دەبێت لەسەر ڕوبەری تەرخانكراو بۆ دەنگی ناڕازیی لە هەرێمی كوردستان، هەروەها لەسەر توانای ڕۆژنامەنوسان لە گەیاندن بەبێ ترس لە تۆڵە و ڕێوشوێنی نایاسایی.
دەشڵێت، شاندی ئەوروپا و نێردە دیبلۆماسییەكان نیگەرانن لەو ئاماژانەی لە بڕیارەكەی دادگادا هاتوون دەربارەی پەیوەندی نێوان تۆمەتباران و كونسوڵخانە بیانییەكان، لەنێویشیاندا كونسوڵخانەی گشتی ئەڵمانیا لە هەولێر، ئاماژە بەوەشدەكەن كە ئاڵوگۆڕی ڕێكخراو لەگەڵ كۆمەڵگای مەدەنی بەشێكی دانەبڕاوە لە كاری نێردەی دیبلۆماسی لە سەرجەم ناوچەكانی جیهاندا.
نێردەی یەكێتی ئەوروپا و نێردە دیبلۆماسییەكانی وڵاتانی ئەندام لە یەكێتی ئەوروپا لە عێراق داواش لە حكومەتی هەرێمی كوردستان دەكەن پابەندییەكانی لەبواری مافەكانی مرۆڤ لەبەرچاوبگرێت، لەنێویشیاندا مافی دادگایەكی دادپەروەرانە و ڕێوشوێنە یاساییە پێویستەكان و، زامنكردنی بەردەستخستی تەواوی ئازادی ڕادەربڕین و ئازادی ڕۆژنامەگەری.
بە بڕیاری ژمارە 468، كە لە 28ی نیسانی ڕابردوو دەریكردووە و كۆتایی هەفتەی ڕابردوو بڵاوكرایەوە، سەرۆكایەتیی دادگای پێداچوونەوەی هەرێمی كوردستان، بڕیاری دادگای تاوانی دووی هەولێری تایبەت بە سزای زیندانیكردن بۆ ماوەی شەش ساڵ بۆ پێنج لە ڕۆژنامەنووس و چالاكوانانی بادینان پەسەندكرد.
ئەمەش دوای ئەوەی لە 16ی شوباتی ڕابردوو سزای زیندانیكردنی هەریەك لە (شێروان شێروانی، شڤان سەعید، ئەیاز كەرەم، هەریوان عیسا و گۆهدار زێباری)، لەلایەن دادگای تاوانی دووی هەولێرەوە دەركرا، پارێزەرانی بەرگری داوای پێداچوونەوە (تەمیز)ی بڕیارەكەیان كرد.
بڕیارێكی “بێمانا”یە كاردانەوەی نێردە نێودەوڵەتییەكان بەرامبەر سزادانی چالاكوانانی بادینان
