بەرگریکاری هەڵبژاردەی نەمسا و یانەی بایرن میونشن، داڤید ئالابا لە پەیوەندیکردن بە یانەی ڕیاڵ مەدرید نزیکبووەتەوە.
ڕۆژنامەی ئاسی ئیسپانی ئاشکرایکردووە، داڤید ئالابا لەهەموو کاتێک زیاتر نزیکە پەیوەندی بە یانەی ڕیاڵ مەدریدەوە بکات، تەنانەت نزیکبوونەوەی جەمسەرەکانیان بە ڕێککەوتن ناوهێناوە و ئاماژەیان بەوە کردووە بەرگریکارە ڕەش ئەسمەرەکە لە یانەی شاهانە وەرزی داهاتوو درێسی ژمارە 14 دەپۆشێت.
بەپێی زانیاریەکان، ئیدارەی ڕیاڵ گومانیان لە بەردەوامبوونی سێرجیۆ ڕامۆس، ڕافائێل ڤاران، مارسێلۆ هەیە، بۆیە گواستنەوەی ئالابا بە پێشەنگی کارەکانیان دەزانن و پێیان وایە یاریزانەکە لە یەک کاتدا دەتوانێت چەند ڕۆڵێک بگێڕێت و کەلێنی هەرسێ یاریزانەکەی دیکە پڕبکاتەوە.
لەم وەرزەدا ئالابا 39 یاری ئەنجامداوە لە سەرجەم خول و پاڵەوانێتییەکان، لە 31 ڕووبەڕوبوونەوەدا لە پێگەی سەنتەری بەرگری باڵی چەپ یاریکردووە واتا لەسەدا (79.48)، تەنها لە یەک یاریدا لە پێگەی بەرگری باڵی چەپ یاریکردووە، لە پێگەی دڵی بەرگری دووجار یاریکردووە، هەروەها لە پێگەی ناوەندی بەرگری پێنج جار بوونی هەبووە، هەمەجۆری پێگەکان و شێوازی یاریکردنی ڕەش ئەسمەرەکە وایکردووە زیاتر لە یانەی شاهانە نزیکبێتەوە.
سەرچاوەکە دووپاتیدەکاتەوە، ئالابا داوای موچەی ساڵانەی بەبڕی 11 ملیۆن لە ڕیاڵ کردووە و ڕیاڵ 10 ملیۆنیان پێشکەشکردووە، کە هاوشێوەی گرێبەستی ڕامۆس و تۆنی کرۆسە، واژووکردنی بۆندەکەشی ڕاستەوخۆ پێگەی ڕامۆس و ڤاران لە یانەی شاهانە یەکلاییدەکاتەوە.
