ڕاهێنەری یانەی مانچستەر سیتی، پێپ گواردیۆلا براکەیی ڕاسپاردووە بۆ ئەنجامدانی دانوستاندن لەگەڵ سێرجیۆ ڕامۆسی بەرگریکاری یانەی ڕیاڵ مەدرید.
ڕامۆس لە هاوینی 2021 بۆندەکەی کۆتاییدێت و تاوەکو ئەم ساتە ڕێککەوتنی لەسەر نوێکردنەوەی نەکردووە، ئیدارەی مێرەنگی پێشنیازی نوێکردنەوەی بۆ وەرزێکی دیکە کردووە بەهەمان موچە و ئیمتیازاتی وەرزی پێشوو و لێبڕینی لەسەدا 10، لە بەرانبەردا یاریزانەکە داوای نوێکردنەوەی بۆ دوو وەرزی دیکە و هەمان موچە و ئیمتیازات کردووە بەبێ لێبڕین.
ڕۆژنامەی ئاسی ئیسپانی لە زاری ڕۆژنامەنوسانی بەشدار لە پرۆگرامی “ئیل شیرینگیتۆ” ئاشکرایکردووە، لە کاتێکدا ڕامۆس و یانەی شاهانە پێکنەهاتوون، پێپ گواردیۆلای ڕاهێنەری مانچستەر سیتی پیێری گواردیۆلای برای ڕاسپاردووە لەگەڵ بەرگریکارە مێژووییەکەی ئیسپانیا گفتوگۆ بکات.
هەوڵەکانی گواردیۆلا بۆ ئەوەیە ڕامۆس پەلکێشی مانچستەر سیتی بکات، لە کاتێکدا 15 ملیۆن یورۆ موچەی ساڵانە و بۆندێکی بۆ ماوەی چوار ساڵی یانەی پاریس سانت جێرمانی ڕەتکردووەتەوە.
سەرچاوەکانی هەواڵ پێیان وایە، ڕامۆس دەیەوێت لە ڕیاڵ مەدرید بەردەوامبێت، ئەم هەڵوێستەشی بە بەڕێوبەرانی یانەکەی ڕاگەیاندووە.
