وەزیری شارەوانی و گەشتوگوزاری هەرێم ڕایگەیاند، بەپێی ماستەرپلانێکی ستاندارد پشتێنەی سەوزای بە دەوری شارەکاندا دروست دەکرێت و لە سەرەتادا دوو پشتێنەی سەوز بە دەوری شاری هەولێردا دروست دەکرێت.
ساسان عەونی، وەزیری شارەوانی و گەشتوگوزاری هەرێم لە لێدوانێکی ڕۆژنامەوانیدا ڕایگەیاند، ” شاری هەولێر دوو پشتێنەی سەوزایی بۆ دیاری كراوە و هەر یەك لەو پشتێنە سەوزاییانەش ماستەرپلانی خۆی هەیە و بەگوێرەی ئەو رێكارەی دانراوە، جێبەجێ دەكرێن”.
وەزیری شارەوانی و گەشتوگوزار ڕاشیگەیاند، ” ئەمە تەنیا بۆ شاری هەولێر نییە، بەڵكوو هەموو شار و شارۆچكەكانی دیكەی هەرێمی كوردستانیش بەگوێرەی ئەو ستراتیژییەی دامانناوە، سەرۆكایەتییەكانی شارەوانی و بەڕێوەبەرایەتیی نەخشەدانانی ئاوەدانی لە پارێزگەكان راسپێردراون كە ماستەرپلانی تایبەتی بۆ دەستنیشانكردنی ئەو رووبەرە سەوزاییانەی كە هەیە دابنێن. هەروەها بەراوردكردنی ئەو ڕووبەرە سەوزاییانە لەگەڵ ئەو ستاندەردەی كە پێویستە هەر شار و شارۆچكەیەك هەیبێت”.
