بافڵ تاڵەبانی، هاوسەرۆکی یەکێتیی نیشتمانیی کوردستان، ئەمڕۆ سێشەممە پەیامێکی بەبۆنەی یادی 17 ساڵەی مورافەعەکەی مام جەلال لە ئەنجومەنی حکومی عێراق بڵاوکردەوە و ڕایگەیاند، ئەمڕۆ بەشانازییەوە یادی هەوڵی بەردەوام و خەباتی بێکۆتایی تۆ دەکەینەوە بۆ کورد و کوردستان.
لە پەیامەکەی بافڵ تاڵەنیدا بۆ مام جەلال هاتووە، “ئەمڕۆ 17 ساڵ بەسەر مورافەعە مێژووییەکەی تۆ بۆ کەرکوک تێدەپەڕێت و ئێمەش بە شانازییەوە یادی ئەو ڕۆژە مێژووییە دەکەینەوە، یادی هەوڵی بەردەوام و خەباتی بێکۆتایی تۆ دەکەینەوە بۆ کورد و کوردستان”.
بافڵ تاڵەبانی دەڵێت، ” لە یادی ئەو ڕۆژە مێژوویی و پڕ لە شانازییەدا پەیمانی خۆم دووپات دەکەمەوە کە هەمیشە هەڵگری پەیام و ڕێبازی تۆ دەبین، هەڵگری خەمی نەتەوە و زمان و بەرژەوەندیی خەڵکی کوردستان بین”.
هاوسەرۆکی یەکێتی دووپاتیدەکاتەوە، “مێژووی درەوشاوە و پڕ لە سەروەریی تۆ دەکەینە سەرمەشقی خۆمان و بە ئومێدەوە لە داهاتوو دەڕوانین”.
ئاماژەی بەوەکردووە کە هیچ سازشێک لەسەر کوردستانیبوونی کەرکوک ناکەن.
دەشڵێت، ” بۆ مێژوو دەیسەلمێنین کە ئێمەین خەمی کەرکوکمان لەسەر شانە و هەموو هەوڵێكیشمان لە ڕابردوودا بۆ پاراستنی خەڵکەکەی بووە و لە داهاتووشدا دەبینە ئەو قەڵغانەی کەرکوک و کەرکوکییەکان دەپارێزێت”.
لە ساڵی 2003 دوای ڕووخانی ڕژێمی سەدام و پێکهێنانی ئەنجومەنی حوکم بە ئەندامێتی سەرکردە دیارەکانی عێراق کە مام جەلال یەکێک بوو لەو ئەندامانە بۆ بەڕێوەبردنی وڵات، مام جەلال نەخشەی دانیشتوان و شوێنی جوگرافی کەرکوکی خستە بەردەم ئەندامانی ئەنجوومەن و پێیڕاگەیاندن کە بەپێی سەرجەم بەڵگە مێژوویی و سەرژمێرییەکان کەرکوک شارێکی کوردستانییە و پارێزگایەکی هەرێمی کوردستانە و ئەمڕۆ 17 ساڵ بەسەر ئەو ڕۆژەدا تێپەڕی.
