کونسوڵخانەی ئەمریکا لە هەولێر، ئەمڕۆ شەممە 3ی تشرینی یەکەم، بەبۆنەی تێپەڕبوونی سێ ساڵ بەسەر کۆچی دوایی مام جەلال-دا پەیامێکی بڵاوکردەوە و ڕایگەیاند، “مام جەلال لە سەختترین کاتەکان دا بە ئازایەتی و داناییەوە سەرۆکایەتیی عێراقی کرد”.
کونسوڵخانەی ئەمریکا لە پەیامەکەیدا دەڵێت، “سەرەخۆشی خۆمان ئاڕاستەی سەرجەم گەلی هەرێمی کوردستان و عێراق دەکەین لە سێیەم ساڵڕۆژی کۆچی دوایی مام جەلال تاڵەبانیدا، تاڵەبانی لە سەختترین کاتەکاندا بە سوربوون، ئازایی، دانایی و گشتگیریی سەرۆکایەتیی عێراقی کرد”.
ئەمڕۆ سێ ساڵ تێدەپەڕێت بەسەر کۆچی دوایی مام جەلال، سکرتێری گشتیی پیشووی یەکێتیی نیشتمانیی کوردستان و سەرۆککۆماری پێشووی عێراق، جەلال تاڵەبانی لە شەشەمین ساڵی سەرۆکایەتیکردنی کۆماری عێراقدا و لە بەرواری 17-12-2012 تووشی “جەڵتەی مێشك” بوو و گەیەندرایە نەخۆشخانەی مەدینە توب لە بەغداد، دوای سێ ڕۆژ مانەوە سەرلەبەیانی ڕۆژی 20-12-2012 بە چاودێریی تیمێكی پزیشكیی تایبەت بەمەبەستی چارەسەر بەرەو ئەڵمانیا بەڕێكرا و لە بەرواری 3/10/2017 لە وڵاتی ئەڵمانیا کۆچی دوایی کرد.
