ڕۆژنامەی موندۆ دیپۆرتیڤۆی کەتەلۆنی هێرشێکی توند دەکاتەسەر ڕۆناڵد کومانی ڕاهێنەر و 10 پرسیاری هونەری و وەرزشیی ئاڕاستە دەکات.
لە کۆتا ڕوبەڕوبوونەوەی جامی سوپەری ئیسپانیا، یانەی بەرشلۆنە بە ئەنجامی سێ گۆڵ بەرانبەر بە دوو دۆڕاندنی تۆمارکرد، یانە کەتەلۆنیەکە بەرانبەر هێز و توانای جەنگاوەرە باسکییەکان دووچاری ئاستەنگی هات.
ڕۆژنامەی موندۆ دیپۆرتیڤۆ دووپاتیدەکاتەوە، بەشێکی زۆری شکستی ئازولگرانا لەم یارییە بەهێزەدا هونەرییە و دەکەوێتە ئەستۆی ڕۆناڵد کومانی ڕاهێنەر، بە پێویستیشی دەزانن وەڵامی ئەم 10 پرسیارە بداتەوە:
- بۆچی ڕیسک بە مێسی-یەوە کرا و لە یارییەکەدا بەشداری پێکرا، سەرەڕای ئەوەی پێکانی هەبووە؟
- بۆچی تاوەکو خولەکی شەشی یارییەکە پێکهاتەی بارسا سەرکەوتوو نەبووە لە تێپەڕاندنی نیوە یاریگای خۆی بۆ ناو یاریگای ڕکابەر؟
- ئایا هەڵە نەبووە لە خولەی 87 ئاڵوگۆڕی بە دیمبیلی و پێدری کرد و لە تایمە زیادکراوەکاندا لەو دوو بەهرەیە بێبەشبوو؟
- بۆچی یانەیەکی گەورەی وەک بەرشلۆنە تاوەکو خولەکی 107ی یارییەکە هیچ لێدانێکی کۆرناری بۆ تۆمارنەکرا؟
- بۆچی لە تایمی یەکەمدا یاریزانانی بەرشلۆنە دەست لەگیرفان بوون (مەبەست لەوەیە کە ڕوحیەتی بردنەوە و جەنگاوەرییان تێدا نەبووە)، لە بەرانبەردا یاریزانانی بلباو بەوپەڕێ هێزەوە چەندین لێدانیان ئاڕاستەی مێسی و هاوڕێیانی کردووە؟
- بۆچی سووربووە لە یاریکردن بە سێرجینیۆ دێست لە باڵی ڕاستەوە، لە کاتێکدا تۆپی بەرزەکانی ڕکابەر لە باڵی ئەم یاریزانەوە ئاڕاستە نەکراون.
- بۆچی ئونای سیمۆنی گۆڵپارێزی بلباو لە ماوەی 120 خولەکی یارییەکەدا جگە لە گۆڵەکان تەنها دوو تۆپی لەلایەن مارتن برەیزوایت و ئەنتوان گریزمانەوە بۆ ناو گۆڵ ئاڕاستەکراوە؟
- بۆچی بە تەنها فرینکی دی یۆنگ لە سەنتەری یاریگا و ناوەندی بەرشلۆنەوە بۆ ناو قوڵایی بەرگری ڕکابەر جموجۆڵ دەکات و لەنێو هێڵەکاندا جێگۆڕکێ دەکات؟ چارەسەر و جوڵەی تاکتیکی دیکەیان نییە؟
- میرالیم پیانیچ لە چی کەمە وا لەسەرەتای ڕوبەڕوبوونەوەکەوە یاری پێنەکرا؟
- بۆچی تیمی بلباو بە تەواوی یاریزانانیەوە تەنانەت پێکراوەکانیش (ئادۆریز پێکرابوو) ئامادەبوو، بەڵام بەرشلۆنە بەهەمان هۆکار کۆتینیۆ و پیکێی بانگهێشت نەکرد؟
