پۆلیسی سلێمانی ڕایدەگەیەنێت، لە دوو چالاكی جیادا هێزەكانیان پێنج تۆمه‌تباریان ده‌ستگیركرد كه له شاخەكانی ئه‌زمڕ و گۆیژه ڕێگرییان له چه‌ند كه‌سێك كردبوو.
بەڕێوبەرایەتیی پۆلیسی پارێزگای سلێمانی ئەمڕۆ دووشەممە 18ی كانونی دووەم بڵاویكردەوە، پاش سكاڵای هاوڵاتییه‌ك كه له شاخی ئه‌زمڕ له‌لایه‌ن سێ تۆمه‌تباره‌وه ڕێگریی لێكراوه و ساڵانه‌ی ئۆتۆمبێل و مۆڵه‌تی شۆفێری و بڕێك پاره‌ی لێسه‌ندراوه، هێزه‌كانی پۆلیس لێكۆڵینه‌وه‌كانیان بۆ ده‌ستگیركردنی تۆمه‌تباره‌كان ده‌ستپێكرد و پاش وه‌رگرتنی بڕیاری دادوه‌ر، له‌لایه‌ن مه‌فره‌زه‌كانی به‌شی پۆلیسی فریاكه‌وتنه‌وه توانرا ده‌ستگیربكرێن.
دەشڵێت، له كاتی ده‌ستگیركردنیاندا ده‌ستیشگیرا به‌سه‌ر چه‌كێكدا له جۆری كڵاشینكۆف و ئۆتۆمبێلێك له جۆری (تۆیۆتا- ئه‌ڤه‌لۆن).
پۆلیسی سلێمانی ڕوونیشیكردووەتەوە، له لایه‌كی دیكه‌وه و له‌سه‌ر سكاڵای هاوڵاتییه‌ك و پاش وه‌رگرتنی بڕیاری دادوه‌ر، دوو تۆمه‌تباری دیكه له‌لایه‌ن مه‌فره‌زه‌كانی به‌شی پۆلیسی نه‌هێشتنی تاوانه‌وه ده‌ستگیركران كه له شاخی گۆیژه ڕێگرییان له هاوڵاتییه‌ك كردبوو و بڕێك پاره‌یان لێسه‌ندبوو. له كاتی ده‌ستگیركردنی تۆمه‌تباره‌كاندا ده‌ستیشگیرا به‌سه‌ر ئۆتۆمبێلێكدا له جۆری (نیسان- سه‌نی).
له ئێستادا هه‌ریه‌ك له تۆمه‌تباران (ك، ك، أ) و (ك، س، م) و (م، ی، م) و (ژ، ف، ع) و (ف، ج، أ) به بڕیاری دادوه‌ر و به پێی مادده‌ی 452 له یاسای سزادانی عێراقی ڕاگیراون و لێكۆڵینه‌وه له‌گه‌ڵیاندا به‌رده‌وامه.
