هاوسەرۆكی یەكێتی لەگەڵ كونسوڵی گشتیی چین لە هەرێم كۆبووەوە و جەختی لەسەر چارەسەرکردنی ڕیشەییانەی کێشەکان کردەوە بەشێوەیەک کە کۆمەڵانی خەڵکی کوردستان سوودمەندی یەکەم بن.
بافڵ تاڵەبانی، ھاوسەرۆکی یەکێتیی نیشتمانیی کوردستان ئەمڕۆ دووشەممە 18ی كانونی دووەم لە دەباشان پێشوازیکرد لە نی ڕووچی، کونسوڵی گشتیی چین لە هەرێمی کوردستان.
لە دیدارێکدا باس لە پەرەپێدانی پەیوەندی، ھەماھەنگی و ھاریکاریی زیاتر لە سەرجەم بوارەکان لەنێوان ھەردوولادا کرایەوە و باس لە پەیوەندی لەمێژینەی یەکێتی و کۆماری چین کرا.
بە پێی ڕاگەیەندراوێكی كۆبوونەوەكە بافڵ تاڵەبانی بەگرنگییەوە لە ڕۆڵ و پێگەی چین-ی ڕوانی و کاراکردنەوە و بووژاندنەوەی ئەو پەیوەندییانەی بە گرنگزانی و داوایکرد لە بوارەکانی ئابوری، فەرھەنگی و کەلتوریدا زیاتر پشتیوانی لە ھەرێمی كوردستان بکەن و لەو ڕوەوە ھەموو هاوکاری و کارئاسانییەکی دەربڕی.
ھەر لە دیدارەکەدا بە وردیی پێشھات و پەرەسەندنە سیاسی و ئەمنییەکان تاووتوێکران و ھەڵسەنگاندن بۆ پەیوەندییەکانی ھەرێم و بەغداد، کێشەی بودجە و قوتی ھەرێمی كوردستان کرا و ھاوسەرۆک بڕیار و گۆشەنیگای یەکێتی بۆ کۆی پرسەکان خستەڕوو و جەختی لە چارەسەرکردنی ڕیشەییانەی کێشەکان کردەوە، بەشێوەیەک کە کۆمەڵانی خەڵکی کوردستان سوودمەندی یەکەم بن.
