بەڕێوەبەرایەتیی گشتیی تەندروستیی سلێمانی چەند رێنماییەکی بۆ خۆپارێزی لە پەتای سکچوون و رشانەوە بڵاوکردووەتەوە و دەڵێت، بە بەردەوامی دەستەکانتان بە سابوونی شل بشۆن.
لە راگەیەندراوەکەی تەندروستیی سلێمانیدا ئەوەشهاتووە، پێویستە هاوڵاتییان چەند رێنماییەک جێبەجێبکەن بۆ خۆپارێزی لە پەتای سکچوون و رشانەوە و ئەمانەن:
پاککردنەوەی تانکی ئاوی خواردنەوەی ماڵەکان بە بەردەوامی بەلایەنی کەمەوە شەش مانگ جارێک، بە بەردەوامی سەری تانکییەکە داپۆشراوبێت.
شوشتنەوەی سەوزە و میوە بەباشی و بە ماددەی پەرمەنگەناتی پۆتاسیۆن یان خوێ یان هەر پاکژکەرەوەیەکی دیکە و پێداکردنی ئاوێکی زۆر.
دوورکەوتنەوە لە خواردنی دەسگێڕەکان و خواردنی سەر عەربانە.
دڵنیابوونەوە لە سەرچاوەی ئاوی خواردنەوە و تەنها ئاوی بەلۆعە بەکاربهێنن بۆ خواردنەوە و ئەگەر نەبوو ئەوا ئاوی کارگەکان، ئەگەریش ئاوی بیر بوو دەبێت بە باشی بیکوڵێنن.
شوشتنی دەستەکان بە بەردەوامی بە سابوونی شل بەتایبەتیش پێش نانخواردن، ئامادەکردنی شیر و خواردن بۆ منداڵ، بەکارهێنانی دەرمان و هەڵسوکەت لەگەڵ نەخۆش و پاش چوونە تەوالێت، نانخواردن، هەڵسوکەوت لەگەڵ نەخۆش و پاککردنەوەی منداڵ.
