هونەرمەند ئەحمەد دەروێش بەهۆی نەخۆشییەوە لە سلێمانی كۆچی دواییكرد.
جەزای ساز، سەرۆکی گشتی کۆمەڵەی هونەری میللی کوردستان رایگەیاند، ئەمشەو هونەرمەند و پێشمەرگەی دێرین ئەحمەد دەروێش بەهۆی نەخۆشییەوە گیانی لەدەستدا.
ئەحمەد دەروێش لە چەند رۆژی رابردوودا بەهۆی تێكچوونی دۆخی تەندروستییەوە رەوانەی نەخۆشخانە كرا. لەوبارەیەوە سەرۆكی كۆمەڵەی میللی پێشتر ئاشكرایكرد، لە نەخۆشخانە پاش پشکنین دەرکەوتووە کە کێشە لە لێدانی دڵیدا هەیە، پێویستی بە ئامێرێکە بۆ رێکخستنی لێدانی دڵی.
ئەحمەد دەروێش مەقامبێژ و هونەرمەندی میللی، برای هونەرمەندی میللی مەحمود محەمەد-ە، خاوەن چەندین گۆرانی و دانیشتنی هونەرییە و لەگەڵ زۆرێك لە هونەرمەندە میللییەكاندا گۆرانی هەیە.
