جێگری سەرۆكی ڕێكخراوی یەكێتیی مامۆستایانی كوردستان ڕایدەگەیەنێت، بەپێی بڕیارێكی وەزارەتی پەروەردەی هەرێم بۆ ئەمساڵی خوێندن بەڕێوەبەر و یاریدەدەری خوێندنگەكان ئەو بەشەوانانەی بۆیان دانراوە هاوشێوەی مامۆستایان دەبێت بيڵێنەوە.
عەتا ئەحمەد جێگری سەرۆكی ڕێكخراوی یەكێتیی مامۆستایانی كوردستان لە لێدوانێكدا بە تۆڕی میدیایی ئێستای ڕاگەیاند، مامۆستایانی قۆناغی ئامادەیی 22 بەشەوانە لە هەفتەیەكدا دەڵێنەوە و مامۆستایانی قۆناغی بنەڕەتی 24 بەشەوانە، بەڕێوەبەر پێنج و یاریدەدەر 10 بەشەوانەیان بۆ دانراوە كە بڕیاری وەزارەتی پەروەردەیە.
ئاشكرایكرد، ساڵانی ڕابردوو بەهۆی پاشەكەوتكردن لەسەر مووچە و ڤایرۆسی كۆرۆناوە چاوپۆشی كراوە، بەڵام بۆ ئەمساڵ بەڕێوەبەر و یاریدەدەری خوێندنگەكان پابەنددەكرێن كە دەبێت بەشەوانەیان هەبێت.
بەرپرسەكەی یەكێتیی مامۆستایان ڕوونكردنەوەی زیاتری دا وتیشی، “ئەگەر لە خوێندنگەیەكدا مامۆستای پسپۆڕ هەبوو بەشەوانەكانیان وەرگرتبوو بەڕێوەبەر و یاریدەدەر دەتوانن بەشەوانە وەرنەگرن، بەڵام ئەگەر مامۆستای پسپۆڕ نەبوو دەبێت بەڕێوەبەر و یاریدەدەری خوێندنگەكان بەشەوانەی خۆیان بڵێنەوە و پابەنددەكرێن بە بڕیارەكەی وەزارەتی پەروەردەوە”.
