بەڕێوبەرایەتیی ئاسایشی ڕۆژئاوای سلێمانی، ڕایگەیاند تۆمەتبارێکیان دەستگیرکردووە کە بە فێڵ و بەناوی ڕێکخراوەوە پارەی لە کەسوکاری شەهیدان وەرگرتووە.
لە ڕاگەیەنراوێکدا کە ئەمڕۆ چوارشەممە 25ی تشرینی دووەم، ئاسایشی ڕۆژئاوای سلێمانی بڵاویکردەوە هاتووە کە تۆمەتبارێک بەناوی (ٲ ، ق، ف) لەناو بازاڕی چەمچەماڵ دەستگیرکراوە، دانیشتووی تەکیەی کاکەمەندە، تەمەنی (30)ساڵە.
ئاسایشی سلێمانی ئاماژەی بەوەشکردووە، “تۆمەتبارەکە لەڕێگەی تەلەفۆنەوە پەیوەندی کردووە بەکەسوکاری شەهید و پێشمەرگە و خێزانە کەمدەرامەتەکانەوە، بەناوی ڕێکخراوێکی خێرخوازی ساختە خۆی ناساندوە و بەڵێنی پێداون کەخانوویان بۆبکڕێت بەمەرجێک ( 20 ٪ ) سەدا بیستی نرخی خانوەکەی پێبدەن”.
لە ڕاگەیەنراوەکەدا هاتووە، “لە لێکۆڵینەوەکان لەگەڵ تۆمەتبارەکەدا دانیناوە بەوەی کە کەبڕی (2500)$ دوو هەزار و پێنج سەد دۆلاری ئەمریکی لە هاوڵاتی (ش ، ح ، م )،
وەرگرتوە کەخێزانی شەهیدێکی پێشمەرگەیە، پەیوەندیی بەکەسێکی دیکەشەوە کردووە لەسەر ئەوە ڕێککەوتوون کەبڕی ( 6000 )$ شەش هەزار دۆلاری ئەمریکیی لێوەربگرێت لەبەرامبەردا خانویان بۆبکڕێت”.
ئاسایشی سلێمانی دەشڵێت، “لەئێستادا بەبڕیاری بەڕێز دادوەری دادگای لێکۆڵینەوەی چەمچەماڵ بەپێی ماددەی (456) لەیاسایی سزادانی عێراقی ڕاگیراوە و لێکۆڵینەوە لەدۆسیەکەی بەردەوامە”.
