مەكتەبی سیاسیی یەكێتی لە ساڵڕۆژی تاوانی ئەنفالدا پەیامێكی بڵاوكردەوە و رایگەیاند:”تاوانی ئەنفال برینێكی وەهای لەسەر دڵمان و لە كۆهزری گەلەكەمان دروستكرد، كە ئازارێكی نەبڕاوەیە و بۆ سارێژی ئەو برینە قووڵە، بۆ سڕینەوەی شوێنەوارەكانی ئەو كارەساتە ناخهەژێنە، پێویستە هەموو لایەكمان لە حكومەتی هەرێم و حكومەتی فیدراڵی و ئەنجومەنی نوێنەران بەوپەڕی لێپرسراوێتییەوە هەوڵەكانمان چڕتڕبكەینەوە بۆ خزمەتكردنی هەمەلایەنە و زیاتری زیانلێكەوتووانی ئەو تاوانە”.
دەقی پەیامەكە:
36 ساڵ لەمەوبەر گەلەكەمان لەسەر دەستی رژێمی ستەمكاری بەعس لەژێر تایتڵی ناڕەوای (ئەنفال) دا بە هەشت قۆناغ رووبەڕوی دڕندانەترین تاوانی كۆمەڵكوژی بووەوە كە سەرەڕای كۆمەڵكوژی و بێ سەروشوێنكردنی 182 هەزار منداڵ وگەنج و پیری كورد، گشت سیمایەكی ئاوەدانیشی لە نزیكەی پێنج هەزار گوند و شارۆچكەی ناوچەكانی ئەنفالدا سڕییەوە .
تاوانی ئەنفال برینێكی وەهای لەسەر دڵمان و لە كۆهزری گەلەكەمان دروستكرد كە ئازارێكی نەبڕاوەیە و بۆ سارێژی ئەو برینە قووڵە،بۆ سڕینەوەی شوێنەوارەكانی ئەو كارەساتە ناخهەژێنە، پێویستە هەموو لایەكمان لە حكومەتی هەرێم و حكومەتی فیدراڵی و ئەنجومەنی نوێنەران بەوپەڕی لێپرسراوێتییەوە هەوڵەكانمان چڕتڕبكەینەوە بۆ خزمەتكردنی هەمەلایەنە و زیاتری زیانلێكەوتووانی ئەو تاوانە.
هەرچەندە لە ساڵی 2008وە دادگای باڵای تاوانەكان لە عێراق كەیسی ئەنفالی وەك تاوانی جەنگ و دژە مرۆیی ناساندووە، بەڵام قەبارەی تراژیدیاكە و دەرهاویشتە و لێكەوتەكانی ئەنفال، پێویستدەكات لەسەر ئاستی نێودەوڵەتیش دیسان وەك تاوانی قڕكرنی بە كۆمەڵ و جینۆساید بناسرێت و گەلی كوردستانیش بە دابینكردنی تێكڕای مافە دەستوورییەكانی بۆ یەكجاری لە ئاییندەی خۆی دڵنیا بكرێتەوە یەكێتیی نیشتمانیی كوردستان بۆ ئەو ئامانجانەی سەرەوە بێدرێغ لە خەباتدا دەبێت.
ـ دروود بۆ رۆحی قوربانیانی كۆمەڵكوژی ئەنفال ، سڵاوی ئەمەك و وەفاداری بۆ خۆراگریی كەسوكاری ئەنفالكراوان .
مەكتەبی سیاسیی
یەكێتیی نیشتمانیی كوردستان
