توێژینەوەیەک دەریخستووە کە گەرمبوونی کەشوهەوا و شەپۆلی گەرما دەبێتە هۆی بەرزبوونەوەی زیاتری نرخی خۆراک لە ساڵانی داهاتوودا و وڵاتانی باشووریش زۆرترین کاریگەرییان لەسەر دەبێت.
بەپێی توێژینەوەیەک کە لە گۆڤاری کۆمیونیکەیشن ئێرس ئاند ئینڤایرۆمێنت بڵاوکراوەتەوە توێژەران ئاماژە بەوە دەکەن، “کاریگەرییەکان بەپێی وەرز و ناوچەکان جیاوازن، بەڵام بەرزبوونەوەی پێشبینیکراوی پلەکانی گەرمی لە ساڵی 2035 دەبنە هۆی بەرزبوونەوەی نرخی خۆراک بە تێکڕای 1.49٪ لە ساڵێکدا”.
دەشڵێت، “لە خراپترین حاڵەتدا زیادبوونەکە 1.79٪ دەبێت و کاریگەری لەسەر هەڵاوسانی گشتی بەرێژەی 0.76٪ بۆ 0.91٪ دەبێت”.
ماکسیمیلیان کوتز، یەکێک لە نووسەرانی توێژینەوەکە، بە ئاژانسی فرانس پرێسی راگەیاندووە، “بە بەراوردکردنی نرخە مێژووییەکان و داتای کەشوهەوای 121 وڵات لە نێوان ساڵانی 1991 بۆ 2020، بەڵگەی بەهێزمان دۆزییەوەتەوە کە بەرزبوونەوەی پلەکانی گەرمی، بەتایبەت لە هاویندا و لە ناوچە گەرمەکان، هۆکارێکە بۆ بەرزبوونەوەی نرخی خۆراک”.
دەشڵێت، “پێدەچێت ئەو بارودۆخە ببێتە هۆی بەرزبوونەوەی هەڵاوسانی نرخی خۆراک و هەڵاوسانی گشتی لە سەرانسەری جیهاندا، بەتایبەتی لەو ناوچانەی کە گەرمن، هاوکات ئەفریقا و ئەمریکای باشوور ئەو دوو کیشوەرە دەبن کە زۆرترین زیانیان بەردەکەوێت”.
