بەپێی نووسراوێك كە ئاراستەی ئەنجومەنی نوێنەرانی كردووە، سەرۆك وەزیرانی عێراق رەزامەندی نیشانداوە لەسەر راستەوخۆ دابەشكردنی مووچەی مووچەخۆرانی هەرێم لەڕێی ئەژماری بانكییەوە.
نووسراوەكە بە ژمارە (3002/ 2333426) لە 15ی تشرینی دووەم لەلایەن نوسینگەی سەرۆك وەزیران ئاراستەی ئەمیندارێتی گشتیی ئەنجومەنی نوێنەرانی عێراق كراوە و تیایدا هاتووە، سەرۆك وەزیران رەزامەندە لەسەر پێشنیاری راستەوخۆ دابەشكردنی مووچەی فەرمانبەرانی هەرێم ئەگەر حكومەتی هەرێم لیستی مووچە و زانیاریی فەرمانبەرانی هەرێم بداتە حكومەتی بەغداد، حكومەتی ناوەندیش راستەوخۆ مووچەكە دەخاتەسەر ئەژمارەكانی مووچەخۆران.
روونیشیدەكاتەوە، تەمویلی پارەی مووچە لە چوارچێوەی پشكی هەرێم لەناو یاسای بودجەی گشتیی عێراق دەبێت و لەو پشكە دەبڕدرێت.
نووسراوەكەی نوسینگەی سودانی وەڵامدانەوەی ئەو داواكاریەیە كە لە مانگی تشرینی یەكەمی رابردوو لەلایەن سەرۆك فراكسیۆنەكانی (یەكێتی، یەكگرتوو، كۆمەڵ و نەوەی نوێ) درایە ئەنجومەنی نوێنەران و، ئەنجومەنەكەش بە نوسراوی ژمارە (257) لە 2ی تشرینی یەكەم ئاراستەی حكومەتی كرد.
