بەهۆی تەقینەوەی غازەوە لە كافتریایەكی سلێمانی دوو كارمەند برینداربوون و سێ كارمەندی بەرگریی شارستانیش تووشی تەنگەنەفەسی بوون.
ڕووداوەكە لە كافتریای كەستانە كە دەكەوێتە نزیك شەقامی سالم (سەهۆڵەكە) بووە و تیمەكانی بەرگریی شارستانی پاش كۆنتڕۆڵكردنی لە هەوڵی هەڵسەنگاندنی هۆكار و خەمڵاندنی زیانەكاندان.
ڕێكان عەزیز وتەبێژی بەرگریی شارستانیی سلێمانی لە لێدوانێكدا بۆ ڕۆژنامەنووسان وتی، ڕووداوەكە كاتژمێر 10:15 خولەكی بەیانی ئەمڕۆ بەهۆی لێچوونی غازەوە بووە، قوفڵی ئیمێرجنسی لە نزیكی هەبووە، بەڵام بەهۆی شڵەژانەوە نەیانتوانیوە بیگرنەوە.
وتیشی، بەهۆی ڕووداوەكەوە دوو كارمەندی كافتریاكە و سێ كارمەندی بەرگریی شارستانی برینداربوون، برینەكانیان سوكە.
هەروەها بەشی چێشتخانەی كافتریاكە زیانی پێگەیشتووە، وەك ئەوەی وتەبێژیی بەرگریی شارستانی وتی.
