سەرۆكی لقی سلێمانی سەندیكای كارمەندانی تەندروستی رایدەگەیەنێت، دەستكراوە بە پێدانی ئۆتۆمبێل بە شێوەی قیست بە كارمەندانی تەندروستی و هاوكات چەند ئۆفەرێكی نوێ بۆ كڕینی ئۆتۆمبێل بە شێوەی قیست رادەگەیەنێت.
هاوژین عوسمان سەرۆكی لقی سلێمانی سەندیكای كارمەندانی تەندروستی لە لێدوانێكدا بە تۆڕی میدیایی ئێستای راگەیاند، لە ئێستادا بەشێك لە كارمەندان و فەرمانبەرانی تەندروستی لەو لێكتێگەیشتنەی لەگەڵ كۆمپانیاكە كراوە ئۆتۆمبێلیان بە قیست كڕیوە و ژمارەیەكی دیكەش مامەڵە دەكەن كە سوودمەندببن.
راشیگەیاند، هەر كارمەندێكی تەندروستی ئۆتۆمبێلەكە بە كاش بكڕێت بڕی هەزار دۆلار داشكاندنی بۆ دەكرێت و تابلۆكەش كە بۆ ئۆتۆمبێلی بچووك هەزار و 100 دۆلارە و بۆ ئۆتۆمبێلی بەرز هەزار و 400 دۆلارە لەسەر كۆمپانیاكەیە و شەش ساڵ یاخود 200 هەزار كیلۆمەتر گەرەنتی كێشەی تێكچوونی گێر و مەكینە و كارەبایی لەگەڵدایە.
ئاشكراشیكرد، ئەگەر بە شێوەی قیست ئۆتۆمبێلەكە بكڕن 40%ی پێشەكی دەدرێت و ئەوەی دیكەی بە قیستی سێ ساڵ دەدرێتەوە و بەهەمان شێوە تابلۆ لەسەر كۆمپانیاكەیە و داشكاندنەكە و گەرەنتی ئۆتۆمبێلەكە دەیانگرێتەوە.
