فەرماندەی هێزەکانی سوریای دیموکرات، لە پەیامێکدا لەبارەی پێکدادانی نێوان پەکەکە و پارتی لە ئامێدی ڕایگەیاند، هێرشی پارتی دیموکراتی کوردستان بۆسەر گەریلاکانی پەکەکە شەرمەزار دەکات.
مەزڵوم عەبدی، فەرماندەی هێزەکانی سوریای دیموکرات، هەسەدە، بەیانی ئەمڕۆ 15ی کانونی یەکەم. لە دوو تویدا لە تیوتەر ڕایگەیاند، “هێرشی پارتی دیموکراتی کوردستان بۆسەر پەکەکە شەرمەزار دەکەین و ئەوە خزمەت بە دۆزی کورد ناکات”.
عەبدی نوسیویشیەتی، “ئێمە بانگی لایەنە کوردییەکان دەکەین کە ئەم هێرشان ڕابگیرێت و دیالۆگ جێگەی بگرێتەوە، هەروەها ئێمە لە ڕۆژئاوای کوردستان ڕێگە بە هیچ کەسێک نادەین هێرشبکاتە سەر بارەگاکانی ‘ئەنجومەنی نیشتمانی کورد لە سوریا، ئەنەکەسە’ “.
Êrîşa Hêzên PDK’ê ya li dijî gerîlayên PKK’ê li Amediyê cihê şermezariyê ye û dê destkeftiyên doza kurdî têk bibe.
Em banga rawestandina êrîşan û çareserkirina pirsgirêkan bi diyalogê dikin.— Mazloum Abdî مظلوم عبدي (@MazloumAbdi) December 15, 2020
ئەم تیوتانەی مەزڵوم عەبدی دوای ئەوە دێت کە دوێنێ مەسرور بارزانی، سەرۆکی حکومەتی هەرێمی کوردستان پەیامێکی ئاڕاستەی عەبدی کردبوو و ڕایگەیاندبوو، “پێویستە هەسەدە لەژێر هەژموونی پەکەکە بێتە دەرەوە و ڕێگە نەدرێت سود لەو هاوکاریانە وەربگرێت کە بۆ هەسەدە ڕەوانە دەکرێت”.
