ئێریک تین هاگ، ڕاهێنەری مانچستەر یونایتد دووپاتیکردەوە، یانەکەی کاردەکات بۆ نوێکردنەوەی گرێبەستی مارکۆس ڕاشفۆرد و دوورخستنەوەی لە یانە خوازیارەکان.
ڕاشفۆردی ئینگلیزی، گرێبەستەکەی لە ساڵی 2024 کۆتایی دێت، یانەکانی بەرشلۆنە و ڕیاڵ مەدریدی ئیسپانی، پاریس سان جێرمانی فەرەنسی و ئارسیناڵی ئینگلیزی پلانیان داڕشتووە بەر لەو وادەیە و لە هاوینی 2023 ئۆفەری خۆیان بخەنە بەردەستی.
وەک وەڵامێک بۆ یانە تەماعکارەکان، تین هاگ ڕایگەیاندووە، کە نوێکردنەوەی گرێبەستی هێرشبەرەکەی ئینگلتەرا لە پێشینەی کارەکانیدایە و دەڵێت، “لە پشت پەردەوە کار لەسەر نوێکردنەوەی گرێبەستەکە دەکەین، بێگومان دەبێت مارکۆس بهێڵینەوە.”
هەروەها دەڵێت، “لە یەکەم ڕۆژەوە کە چاوم پێیکەوت، پێموت، دەمەوێت زەردەخەنە لەسەر ڕووخسارت ببینم، ئێستا ئەو لە کەشێکی خۆشدایە”.
