قوباد تاڵەبانی جێگری سەرۆک وەزیرانی هەرێمی كوردستان لەگەڵ فایق زێدان سەرۆکی ئەنجومەنی باڵای دادوەريی عێراق کۆبووەوە و جەختیكردەوە، “بژاردەی گونجاوی بەردەم هەرێم و بەغداد رێککەوتنێکی درێژخایەنی گشتگیرە کە لە بەرژەوەنديی هاوڵاتیاندا بێت”.
كۆبوونەوەكە ئەمڕۆ سێشەممە لە بەغداد بەڕێوەچووە و خالید شوانی وەزیری دادی حکومەتی فیدراڵ تیایدا بەشداربووە، قوباد تاڵەبانی و فایق زێدان دۆخی دادوەری لە عێراق و هەرێمی کوردستان و پرسە یاساییەکانی نێوان هەرێم و حکومەتی فیدراڵیان تاوتوێکردووە.
بەپێی راگەیەندراوی کۆبوونەوەکە، جێگری سەرۆک وەزیرانی هەرێمی كوردستان لەبارەی پەیوەندییەکانی نێوان هەرێمی کوردستان و حکومەتی فیدراڵ، جەختیکردووەتەوە لەوەی بژاردەی گونجاوی بەردەم هەردوولا، رێککەوتنێکی درێژخایەنی گشتگیرە بەپێی دەستوور کە لە بەرژەوەنديی هاوڵاتیانی عێراق و هەرێمی کوردستاندا بێت.
