توێژینەوەیەک کە پەرلەمانی ئەوروپا ئەنجامییداوە دەریخستووە کە قەیرانی ئێستای تێچووی ژیان مایەی نیگەرانییە بۆ زیاتر لە %90ی ئەوروپییەکان .
93%ی ئەوانەی بەشدارییان لە ڕاپرسییەکەدا کردووە وتوویانە نیگەرانن لە بەرزبوونەوەی تێچووی ژیان، لەکاتێکدا 46% پشتڕاستیان کردووەتەوە کە ئاستی ژیانیان بەراورد بە پێشتر دابەزیوە و 39% پێشبینیان کردووە لە داهاتوودا کاریگەرییەکانیان لەسەر دەردەکەوێت.
کۆی گشتی 45% یان ئێستا رووبەڕووی سەختی و کاریگەرییەکانی تێکچوونی بژێوییان بوونەتەوە.
پێشتر ئامارەکانی ئەوەیان ئاشکراکردووە هەڵاوسان لە ناوچەی یۆرۆدا 9.2% ـە، بەپێی داتاکانی ئاژانسی ئاماری یەکێتیی ئەوروپا (یۆرۆستات).
نیگەرانییە سەرەکییەکانی دیکە بۆ هاوڵاتییانی یەکێتیی ئەوروپا بریتیبوون لە هەژاری و تێکچوونی کۆمەڵایەتی بە ڕێژەی (82%)، گۆڕانی کەشوهەوا (81%)، شەڕ لە ئۆکرانیا (81%) و مەترسیی ڕووداوی ئەتۆمی 74%.
