زۆرینەی یانە زەبەلاحەکانی ئینگلتەرا بەهۆی گڕوتینی یاریزانانی چێڵسی و کارامەیی فرانک لامپاردەوە ترسی لەدەستدانی نازناوی ئەم وەرزەی پریمەرلیگیان لێنیشتووە.
ڕاهێنەری یانەی لیڤەرپوڵ، یۆرگن کلۆپ پێی وایە یانەی چێڵسی پاڵێوراوی سەرەکییە بۆ چنینەوەی نازناوی ئەم وەرزەی خولی نایابی ئینگلیزی، لەم بارەیەوە بە میدیاکانی ڕاگەیاندووە، ” کە سەرنج لە یارییەکانی ئێستای تۆپی پێ دەدەم، بۆچونێکم بۆ دروستدەبێت کە یانەی چێڵسی دیارترینە بۆ چنینەوەی نازناوی پریمەرلیگ، ئەوان خاوەنی پێکهاتەیەکی تێروتەسەل و یاریزانی گەورەن، سەرەتای وەرز ئاستێکی ئاساییان پێشکەشکرد و لە ئێستادا ئاستیان هەڵکشاوە و هەموو یاریزانانیان لە ترۆپکی تواناکانیاندان، ڕاهێنەر بژاردەی زۆری لەبەردەمدایە و دەتوانن گۆڕانکاری و ئاڵوگۆڕی بەردەوام ئەنجامبدەن”.
بلوزی لەندەن لە کۆتا ڕوبەڕوبوونەوەیدا بردنەوەی بەرانبەر لیدز یونایتد تۆمارکرد، تاوەکو ئێستا لەکۆی 11 ڕوبەڕوبوونەوەی پریمەرلیگ 22 خاڵیان کۆکردووەتەوە و ململانێی پلەی یەکەمی ڕیزبەندی پریمەرلیگ دەکەن.
ئەم جیاوازییەش کە لە ئاستی یانە شینەکەی لەندەن دروستبووە پەیوەندی بە بونیادنانەوەی پێکهاتەکەیانەوە هەیە لە هاوینی ڕابردوو بەبڕی 220 ملیۆن پاوەند، تەنانەت لە کۆتا 16 یارییدا خۆیان لە هەر شکستێک پاراستووە.
بە پێچەوانەوە، یانەکانی لیڤەرپوڵ و مانچستەر سیتی و یونایتد بەهۆی ماندوبوون و کەموکورتی پێکهاتەکانیانەوە، پاشان پێکانی بەردەوامی یاریزانانیان نەیانتوانیوە لە ئاستی وەرزەکانی ڕابردوودابن، بەم هۆیەوە زۆرینەی ڕاهێنەرە گەورەکانی وەک کلۆپ و گواردیۆلا و سۆڵشایەر و تەنانەت ڕاهێنەرانی یانە مامناوەندەکانیش ئاماژەیان بە گەڕانەوە بەهێزەکەی بلوزی سەردەمی لامپارد کردووە و وەک پاڵێوراوی سەرەکی نازناوی 2020/2021ی خولی نایابی ئینگلیزی لێیان دەڕوانن.
