پەرلەمانتارێكی هاوپەیمانیی دەوڵەتی یاسا دەڵێت، ناردنی 200 ملیار دینارەكە بۆ هەرێمی كوردستان، خۆبەزلزانیی حكومەتە و ئاڵنگارییەكی ڕوونی بڕیارەكانی دەسەڵاتی دادوەری و پێشێلكردنی بڕیاری دادگای فیدراڵییە.
عارف حەمامی، پەرلەمانتاری عێراق لە هاوپەیمانیی دەوڵەتی یاسا ڕایگەیاند، حكومەتی كاربەڕێكەر بەسەرۆكایەتیی مستەفا كازمی، هەوڵی داوە هەموو ڕێكار و ڕێنماییەكانی دەستوور و بڕیارەكانی دادگای فیدراڵی پێشێلبكات.
وتیشی، ئەم حكومەتەی ئێستا مانگانە نزیكەی 250 بۆ 300 ملیار دینار دەدات بە هەرێمی كوردستان، لەكاتێكدا گەلی عێراق لە ناوەڕاست و باشوور بەدەست هەژاری و برسێتی و بێكاری و چەقبەستوویی ئابورییەوە دەناڵێنن.
دوێنێ ئەنجومەنی وەزیرانی عێراق بڕیاریدا 200 ملیار دینارەكە بۆ هەرێمی كوردستان بنێرێت، پەرلەمانتارەكەی هاوپەیمانیی دەوڵەتی یاسا ئەوە بە “خۆبەزلزانیی حكومەت و ئاڵنگارییەكی ڕوونی بڕیارەكانی دەسەڵاتی دادوەری” ناودەبات.
حەمامی لەو بارەیەوە دەڵێت، “حكومەتەكەی كازمی، بڕیارەكەی دادگای فیدراڵی پێشێلكردووە كە حكومەتی هەرێمی پابەندكردووە لە بەرامبەر ناردنی بودجەدا هەموو داهاتەكانی نەوت و غاز ڕادەستبكات”.
